علمى ابنك الثقة بالنفس و تقدير ذاته

من شويه فرح كانت بتعمل الواجب كان عن الصفات فكان في ورقه بتسئلهم شيفين ايه الصفات اللي بتميزكم 
انا كساره انبهرت اد ايه هي فاهمه نفسها وكتبت تقريبا الصفات بالترتيب ومن غير تردد 😄
وهي بمنتهي الثقه
ذكيه
سريعه
سعيده
شكلي جميل
شجاعه
محبوبه
مهتمه باللي حوالليا
بفكر كويس
فرح وهي بتكتب كانت مقتنعه جدا ان فعلا دي مميزات فيها وده حقيقي
طيب ازاي الام توصل ان ابنها يبقي عنده الثقه دي في نفسه وشايف نفسه كده بس يبقي حقيقي كده مش نفخ وخلاص
الاول عايزه اشرحلكم ازاي القناعه بتتكون
القناعه في الاول بتبقي مجرد راي وبعدين حصل اكتر من موقف أكدوا الرأي دي فتحول من راي الي قناعه
اديكم مثال :
لو انا كساره في فكره انا وخداها عن نفسي اني ذكيه
وبعدين حليت كويس في الامتحان فالميس سقفت لي وقالت لي اني ذكيه وبعدين ساعدت اخويا في حاجه فقالي عرفتيها ازاي دي انت ذكيه بعد شويه بتأكد اني فعلا كده وبتصرف بالثقه دي 😊
وكمان ببقي رابطه الذكاء بأحداث حقيقيه مش مجرد كلام مجامله لا انا عندي دليل عقلاني علي ده 😊
طيب انا بقي كام ازاي اعمل ده
١-حاولي تركزي ايه الصفات اللي بتميز ابنك
٢-راقبي اي تصرف استخدم فيه الصفه دي
٣-أوصفيله عمل ايه بالتفصيل وقوليله اسم الصفه اللي بتدل عليه
٤-كرري ده كتير لحد ما يتحول الموضوع لقناعه جواه
مثال :
لو حاسس ان ابني منظم
هستني لما يرتب اي حاجه وأقوله الجهد اللي عمله بالظبط مثلا
رتبت الورق فوق بعض ومنستش تقفل الأدراج بعد ما دخلت فيها الحاجات ورجعت الحاجات مكانها وحطيت الهدوم اللي مش نضيفه في مكانها هو ده النظام
طيب في كام حاجه عشان الموضوع ميقلبش غرور
فكره اني امدح الشخص نفسه من غير ما اقول الجهد المبذول يعني انا كساره مش موافقه اوي علي انها توصف نفسها مش افعالها بالصفات دي بس ناويه ألفت نظرها انها لو مفضلتش تعمل مجهود جوده الصفات دي هتقل
كمان مفيش داعي للمبالغه بلاش انت اشطر ولد شفتوا في حياتي وأجمل بنت في العالم الولاد لما بتختلط بالمجتمع وتعرف ان القرد في عينه مامته 😂بيجيلها احساس بالاحباط والظلم وتحس اشمعني الناس اللي بره مش مقدراها كده
واكيد بلاش المقارنه بالغير بلاش اشطر من كل زمايلك اسرع من كل أصحابك
اسرع واحد فيهم عشان تقريبا لو حد تفوق عليه ممكن يولع فيه وفي نفسه من الغيره لان بيربط الصفه الكويسه بالمكانه كمان ودي حاجه منقدرش نوفرها
الانسان اللي عنده سلام داخلي بيراقب مجهوده بيحس بالتحسن ومش بيبقارن نفسه بحد ممكن يتاثر لو غلط بس مش بينهار
ممكن يحبط لو حد سبقه بس مش بيتعقد ويبطل يحاول
ارجع واقولكم
وصف المجهود مش الشخص
ربط المجهود بصفه
توازن
استمراريه
احسن وحوش 😊♥️💪💪💪
#طفل برنس في نفسه
سارة سيف