تجربة ناجحة فى الاستشارات التليفونية و العيادة:فقط كان ينقصنى الثقة ان بنتى عياطها مش سببه جوع

السلام عليكم
انا مشكله الرضاعه معايا بدات من ساعة مابنتي اتولدت لانهم ادوها لبن صناعي في المستشفي وانا مكونتش اعرف للاسف اضرار الموضوع ده ومن اول يوم طبعا بنتي كانت بتعيط فيقولولي البنت مش شبعانه واخدت صناعي ومرة فمرة بدا الصناعي يكتر لغايه مبقيت تقريبا الاكتر صناعي
فروحت لدكتورة شروق العياده وقالتلي ان الحمد لله ان لبني كويس وعلمتني وضعيه الرضاعه الصحيحه والحجات الي تزود اللبن واني ابدا اقلل الصناعي كل يوم شويه وفعلا بدات اعمل كده
الموضوع اكيد مش سهل في البدايه هي كانت بتعيط عشان متعوده علي الببرونه وطبعا الي حوليا كانوا يقولولي مش شبعانة وحرام عليكي لكن انا فضلت مصممه
و واحده واحدة بدات تتاقلم علي الوضع وكانت دكتورة شروق بكلمها يوميا وفضلت الله يكرمها معايا متابعه لغايه مالحمد لله بطلت الصناعي خالص
وفضلت اول ست شهور ترضع طبيعي فقط وطبعا ده بفضل ربنا ودكتورة شروق عرفتني قد ايه الرضاعه الطبيعيه مفيدة للطفل وكمان للام ياريت اي واحدة كانت في نفس الظروف متستسهلش ولازم تعمل الي عليها وتتعب عشان خاطر صحه ابنها ولازم تقرا كتير وتتثقف من وهي حامل

المقال من باب المعلومات العامة و لا يغنى عن زيارة الطبيب.فاستشيرى طبيبك و طبيب طفلك فى كل ما يخصكما