كيف نجعل اولادنا يكرهون الدراسة دون ان ندرى ~ مدونة د.شروق الهيتمي للتغذية والرضاعة الطبيعية

يووووه الدراسة رجعت...

يااااه المدارس بكرة..

نرجع للصحيان بدرى تاني..

يا دى الهم والواجبات والحبسة في البيت...

رسائل سلبية عمالين نبعتها لنفسنا واولادنا... ليه بنعمل كده!!!

عارفه الرد ان تعليم اصلا فاشل... تعليم مالوش لازمة... حشو حشو حشو وضغط ع الولاد وعلينا وكل ده مالوش لازمة.. زنقة في الوقت عشان نلحق نخلص الواجب مع التمارين مع باقي المسئوليات اللى ورانا...

أولا كده حضرتك المخ بيقتنع بالكلام اللى بيتردد عليه كتير يعني هتفضلي تقولي كده، هتفضلي كاره المدرسة وايامها وسنينها... وطول ما أولادك سامعين الكلام ده عقلهم هيقتنع بيه خلاص وهيتصرف بناء علي كده...

طيب والحل ايه واحنا فعلا مش طايقين نفسنا...الحل في الكام نقطة اللى جايين دول

👍🏼

1- نحمد ربنا ان لنا أولاد، وان ربنا رزقنا وقادرين ندخلهم مدارس مش أولاد شوارع

😄، وأن مخهم بيكبر وبيدخلوا مرحلة جديدة، الحمد لله معندهمش تخلف عقلي يعني..

2- نفرح الأولاد ونحسسهم ان المدارس دى فرصة ان مخنا يكبر ونتعلم أكتر.. في ناس بتعمل لولادها احتفال اول يوم دراسة وهم نازلين عشان يبدأوا السنة ب فرحة كده... زى يصحوا من النوم يلاقوا بلالين متعلقة.. تدوهم اى اداة من أدوات المدرسة في هدية ملفوفة ك مفاجأه... أفكار كتير

3- لما الطفل يرجع نستقبله بحب واريحية، اكون مخلصة اللى ورايا واهدى منتظراه، ما يكونش ورايا حاجات ومضغوطة عشان ده ما يطلعش عليهم...

4- نهيئ لهم جو لطيف.. أكل كوب عصير.. مكان نظيف.. كلمات تشجيع
Children do better when they feel better

😊

5- نسيب الطفل يحط الروتين بتاعه routine chart ونرسمه كده بشكل حلو ونعلقه ونساعده انه يحدد هيعمل ايه امتي ولمدة اد ايه..

6- نحط اتفاقات مع بعض... ونشجعه انه يلتزم بيها... زى مثلا (انا هرجع أخد دش وأرتاح نص ساعة وبعد كده أبدأ) (هاخد بريك مثلا عشر دقائق كل ساعة)
لاقينا انه خلّ ب الاتفاق زود في فترة الراحة مثلا نفكره بالاتفاق اللى بينا..
الطفل لما يحس ان هو اللى واخد القرار وهو اللى بيحسم الأمر ده هيشجعه ع الالتزام أكتر.. هيعلمه روح المثابرة

7- بلاش قصة ان اول ما يجي تفتحي الشنطة انت وتشوفي الحاجة اللى وراه وهو قاعد مش دريان بالدنيا لأن ده يعلمه ان اى حد تاني يهتم بحاجاتي وينظم لي اللى ورايا، انا ما بعرفش انظم ولا اعرف اللي ليا واللى عليا

8- بلاش بقي ركز يا حيوان...مفيش فايدة فيك... هتفضل طول عمرك مع بتفهمش... والشباشب بقي والشخط يبتدى.. كل ده هيخليه يكره المذاكرة وسنينها لأنه هيفهم ان المذاكرة يعني تهزيء..

9- كلمات التشجيع مفيش احسن منها...(زى انا مبسوطة ب انجازك... المجهود المبذول رائع... انا واثقة انك هتقدر تحقق اللى انت عايزه..)

10- لو بيذاكر وبيبذل اللى عليه فعلا وجه في اى امتحانات النتيجة مش كما ينبغي حسسه ان انجازه في المذاكرة هو الأهم، وان لسه فيه فرصة، عشان يتعلم ان الخطأ مش آخر الدنيا، وان علي طول في فرصة لتدارك الخطأ

11- نحاول ان المذاكرة تكون بشكل مرح، يعني حاجة في العلوم نجيب لها فيديو يشرح مثلا الجهاز الهضمي... فيديو عن الضوء وانكساره.... او نعمل تجارب عملية زى الحالات الثلاثة للماء...
درس في الجغرافيا نجيب الاطلس نشرح عليه وهكذا...

12- الناس اللى هتقول مفيش وقت لكل ده ورانا خمستلاف حاجة...احب اقولك انه فعلا تعليم بلدنا مش ولابد، ف نحاول نخليه لطيف ونحاول نطلع منه بشخص يعرف يحط روتين لنفسه ويلتزم بيه... نحاول نبني شخصية... بلاش نهد العلاقة اللى بنا وبين اولادنا عشان تعليم زى ما بيقولوا مالوش اى لازمة...