تجربة ناجحة:ثقتى بنفسى زادات لما نجحت
فى الرضاعة الطبيعية و منعت الصناعى
من سنة وتلات شهور ربنا رزقنى ببنتى وبالرغم
من انى أصريت ع الولادة الطبيعية وانى كمان للأسف دكتورة إلا إنى ماحضرتش نفسى لموضوع
الرضاعة.
أول ماولدت كنت تعبانة شوية ولما جابوهالى
علشان أرضعها ماعرفتش واديتهالهم تانى لان الحلمة كانت داخلة لجوة وبالرغم من انها
كانت بكل سهولة ممكن تطلع بتدريب السرنجة الا انى اتوترت جدا واللى حواليا بدأوا يزودوا
ف التوتر ده.
فضلت لمدة اسبوعين اعصر واديها بالببرونة
ومع اصرار اللى حواليا ضعفت وبقيت أدى رضعتين صناعى مع اللى بعصره.
استمريت على كده اسبوعين وأنا ف حالة سيئة
جدا وصعبان عليا إنى مش عارفة أرضعها وإنى إديت صناعى لغاية ماصديقة عزيزة ليا عرفتنى
على صفحة الدكتورة شروق.
وبالفعل شفت فيديوهات وبقيت أحاول بالرغم
من الضغط النفسى من كل اللى حواليا.
حرام عليكى انتى مجوعاها اديها رضعتين حتى/كده
مش حاتكبر /اللبن الطبيعى مش كفاية.
لدرجة ان أمى كانت بتتخانق معايا كل يوم
بسبب الموضوع ده.
رحت لدكتورة شروق من غير ماحد يعرف غير
أمى وماكنتش موافقة برضو وبصراحة الدكتورة ادتنى دعم خلانى أقدر أكمل و علمتنى ازاى امنع الصناعى.
منعت الصناعى وبقيت طبيعى بس من عمر شهرين
واستمريت على كده الحمد لله وجبت غطا الرضاعة وبقيت برضع ف كل مكان عادى.
أنا كنت مدمرة نفسيا ومفيش دعم معنوى من
أى جهة وحاسة إنى حاحرم بنتى من نعمة كبيرة جدا وإن أمومتى مش كاملة.
لما بدأ موضوع الرضاعة يظبط وبنتى تتحسن
كان إحساسى فوق الوصف وبقيت أقوى ومفيش كلمة سلبية بتأثر فيا.
بقول لكل أم صرى على الرضاعة الطبيعية مهما
كانت التحديات والكلام السلبى واعرفى ان كل ده ف ميزان حسناتك.
No comments:
Post a Comment