الاستشارة على الماسنجر ساعدنى على علاج وجع الرضاعةعن طريق تعلم الوضع المناسب بالمحاكاة من فوق الملابس
الاستشارة على الماسنجر ساعدنى على علاج وجع الرضاعةعن طريق تعلم الوضع المناسب بالمحاكاة من فوق الملابس
انا حابة اشارككم تجربتى علشان تتشجعوا وكمان لو اقدر من خلال تفاصيلها افيد اى حد فى نفس ظروفى
انا ام لتوأم .. ومن وقت الحمل وانا بفكر فى موضوع الرضاعة وكنت كل لما اعمل بحث عن رضاعة التوأم الاقى الغالبية العظمى بتقول مستحيل وصعب جدا انك ترضعى توأم طبيعى ولازم صناعى والصناعى بيكون أكثر ومع الوقت اصلا الاطفال بتسيب الطبيعى ... واصلا الل معاها طفل واحد ساعات مش بتكفيه فازاى توأم يرضعوا طبيعى بس .. ولدت اطفالى وزنهم قليل والدكتور اول حاجة كتب صناعى عشان الوزن يزيد .. وانا بدأت ارضع طبيعى مع صناعى وكنت بفضل بالساعات عشان يعرفوا يرضعوا سواء طبيعى أو صناعى وكل لما اروح للدكتور يقولى الل بياخد طبيعى اكتر مكبرش والصناعى هو الل كبر حسيت انى بضره لما بديله طبيعى وبدأت أدى صناعى لغاية ما وزنهم بقى كويس بس من جوايا كنت بتألم جدا كل لما ارضعهم صناعى وجوايا قلت لازم أحاول اكتر فى الطبيعى وكان فى واحد مصه ضعيف والتانى كل لما يرضع ميشبعش وكانوا مش بيسكتوا الا لو اديت صناعى .. طبعا قابلت تحديات كبيرة من احباط من الل حواليا والتهاب فى الحلمة وتفاصيل كتير مش عايزة ادوشكم بيها.. بس بعد وقت قررت اكلم استشارية رضاعة طبيعية وسمعت عن دكتور شروق أنها شاطرة جدا وفعلا كلمتها وأول سؤال قولتلها هو التوأم ينفع يرضعوا طبيعى بس.. قالتلى طبعا وفعلا شجعتنى جدا وبدأت ازود مرات الرضاعة الطبيعى واقلل الصناعى لغاية ما اللبن زاد إلى جانب مدرات اللبن والأكل والولاد بقوا بيشبعوا وتمام وبقيت بدى بس رضعة واحدة صناعى لغاية مع الوقت اتفاجات أنهم رفضوا الصناعى اصلا ومهما اغير نوع اللبن والبيبرونات مفيش فايدة. طبعا الموضوع مجهد بس كنت مبسوطة وفى متابعة دكتور الاطفال اتفاجأت أن وزنهم مازادش .
فكلمت دكتور شروق قالتلى متحبطيش وشجعتنى اوى انى أكمل وفعلا كملت والشهر الل بعده لاقيت الوزن اختلف وزاد مش كتير بس الدكتور قالى طبيعى لأن فيه واحد اصلا رضعته ضعيفه وده وقت دخول اكل مع الرضاعة الدنيا هتتظبط وفعلا عملت كده ومع المتابعة مع دكتور شروق وتشجيعها لى الموضوع فرق جداااا وبقوا يرضعوا اغلب الوقت طبيعى والصناعى قليل جدا ومع الوقت بستغنى عنه إلى جانب الاكل ..انا عايزة اشكرها جدا لانها شجعتنى وساعدتنى كتير وكنت بحس انها اختى وخايفة على وعلى اولادى رغم أننا مااتقابلناش كل ده ع التليفون ولما قولتلها أن عندى التهاب فى الحلمة كلمتنى فيديو وظبطت معايا طريقة الرضاعة طبعا وانا متغطية ..وفرق معايا جدا فى الألم خف كتير وفرق معايا أن عندنا دكاترة كده امناء وبيتعاملوا بكل قلبهم ورغم انى كنت دوشاها بس كانت دائما ترد بكل حب وصدر رحب وكل همها تساعدنى وبس .. ..وانا كمان عايزة اشجعك. الموضوع مش سهل بس محبتك لاولادك هتخليكى تستحملى عشان تقدمى لهم افضل حاجة .كمان الولد اللى كان بيرضع صناعى اكتر كانت علاقته بيا مش زى اخوه لكن بعد ما الاثنين اعتمدوا على لبنى بقيت احس انى امهم الاثنين فعلا . و عايزة اقولك كمان مفيش حاجة اسمها لبن خفيف وقليل ومبيشبعش. لو قليل رضعى كتير وسوائل ومدرات لبن ولو مش بيشبع ظبطى اكلك طبعا كل حد وطاقته وفى ناس غصب عنها وليها ظروف مختلفة معذورة... بس لو تقدرى لأن اولادك يستاهلوا افضل حاجة
تعليقات
إرسال تعليق