تجربة ناجحة بطلت الصناعى بالتدريج بمساعدة استشارية الرضاعة

د .شروق السلام عليكم
اتمنى من حضرتك تشاركى تجربتى مع اى ام حاسه باليأس من انها ترجع ترضع طبيعى من تانى
انا ولدت قيصرى واول لما ولدت الدكتور الله يسامحه كتب لبنتى بيبرونة اعشاب ولما رجعت البيت كنت برضعها ليل نهار وماكنتش بتنام خالص وكنت بحسها مش بتشبع وطبعاً مع وجع الجرح والسهر كنت بموت بس كنت متمسكة جداً انى ارضعها طبيعى وبعد اسبوعين جرحى فتح وجالى نزيف صعب اوى وطبعاً خدت مضادات حيوية كتير جداً عشان النزيف يقف واللبن وقف خالص وبنتى خست وعشان قريت انى لو بطلت اديها صدرى اللبن هيقف فصلت اديهولها عشان احفز القنوات اللبنية بس طبعاً الدكتور كتبلها صناعى وبدأت تحبه برغم انه على طول كان مسببلها غازات والاستول كان على طول بيغرقها ولما الحمدلله ربنا شفانى حاولت اقلل من الصناعى وارجع اديها صدرى كتير بس كانت بتصرخ وبدأت تكره صدرى وترفضه وطبعاً كلام اللى حواليا احبطنى جداً زى حرام عليكى لبنك مش مشبعها اديها بيبرونة وكانت نفسيتى تعبانة جداً ويأست خالص بس الحمدلله لقيت الجروب بتاع حضرتك وعرفت ان فيه استشاريين رضاعة طبيعية وروحت لدكتورة فى الجيزة والحمدلله بفضل ربنا ومساعدتها رجعتلى ثقتى بنفسى وان عندى لبن وانى ممكن ابطل الصناعى وبالتدريج بطلت الصناعى ورجعت ارضعها تانى بعد معاناة طويلة والحمدلله ارتحت نفسياً وضميرى مرتاح لأنى ماقصرتش فى حق بنتى وماكنش فيه حاجة كان المفروض اعملها وماعملتهاش

عشان كدة انا نفسى ان محدش يعيش تجربتى وان كل الامهات مهما كانت صعوباتهم يحلوها ويتمسكوا بالرضاعة الطبيعى

ونفسى اساعد حضرتك بأى حاجة فى مجهوداتك الجميلة مع كل الامهات

هذا المقال للمعلومات العامة و لا يغنى عن زيارة الطبيب فاستشيرى طبيبك و طبيب طفلك فى كل ما يخصكما