تجربة ناجحة مع كورس الرضاعة و الفطام

 رحلتى مع الرضاعه للفطام

بدأت الحكايه وانا حامل .. كان تفكيرى انى بجد مش عايزه أرضع طبيعى علشان مابوظش جسمى .. لقيت بالصدفه الناس بتشكر فى دكتوره شروق ولاقيتها عامله كورس عن الرضاعه .. قولت اخده اخد فكره .. الكورس شقلبلى موازينى .. بدل ماكنت مش عايزه .. بقيت مستميته انى ارضع .. واستحمل الم فالاول لحد ماعرفت الصح و عرفت ارضع ازاى .. الكورس كان رائع .. قريب من القلب عرفنى اد ايه دى معجزه اد ايه دى اول احلى حاجه هتفرق فحياتها انا اقدر باذن الله اقدمهالها .. الكلام مش هيوفى الاحساس الى وصلى .. رحلتى مع دكتور شروق موقفتش لحد هنا .. هى ساعدتنى استعد ازاى نفسيا وجسديا الولاده لما ولدت فجأه وكانت بظروف صحيه ملخبطه للاسف أثرت على اللبن وعلى انى اعرف ارضع ..كنت محتاجاها بعتتلى دكتوره ربنا يباركلها يا رب ساعدتنى كتير جداً وفضلت مش سايبانى لحد مالرضاعه بدأت تنتظم وبنتى تعرف ترضع ..

فى نص الرحله حصلت اصابة عمل بنتى عضدتنى وهى بتلعب من غير ماتقصد عملتلى مشكله كبيره جدا .. كانت نتيجتها حاجه مؤلمه واحتقان رهيييييب فالصدر .. وكان للاسف يوم جمعه معرفتش اروح لدكتوره شروق كلمتها .. فضلت معايا خطوه بخطوه وقالتلى اعمل ايه واتحلت بادوات مش مجرد خطوات كده .. وهى كانت معايه بتقولى اعمل ايه .. لانى مكنتش مستحمله اأجل يوم تانى .. وربنا ستر وخلتنى اعدى الازمه دى

دورها موقفش كده بس وصلنا لمرحلة الفطام بسبب الكورونا اجلت انى افطمهالحد بعد السنتين .. كانت بنتى فاهمه وحساسه جداً جداً .. وانا طول فترة الرضاعه كنت مقتنعه بمبدأ الرضاعه وقت الطلب .. فكان بالنسبالى مستحيل افطم مره واحده لان قلبها هيتكسر اوى .. ومستحيل افطم تدريجى لان هى مش هتسبنى مجرد مابقعد بتطلب ترضع .. بعت لدكتور شروق وطمنتنى وقالتلى واحده واحده .. وكان لما كل الناس الى حواليا يقولولى افطميها يلا دى كبرت.. كانت هى من اكبر ال support system الى موجودين فحياتى .. قالتلى بالراحه .. ولما كانت بتسنن فنص الفطام التدريجى قالتلى وقفى واستجيبلها واجلى ..

بدأت رحلة الفطام .. واستعنت بالله وكنت بدعى اوى انه يكرمنى .. وفعلا هو الموضوع ده فيه سحر ربانى هو زى مارزقنا بالرضاعه .. هو فصلنا بالتدريج وبحنيه عن بعض فى وقت مناسب لينا احنا الاتنين ..

بدأت أقلل رضعات الصبح واحده واحده أشغلها نلعب .. ننزل أفرهضها .. من غير ماقولها لا .. وبدأت أدخل قاعدة ان الرضاعه على السرير بس .. لحد ماوصلنا ان رضعه واحده بس فى الناب .. بعدين كنت حابه كل ماوصل لانجاز .. اثبته فتره علشان تنسى بالراحه ويثبت الوضع ده فى عقلها .. بعدين بدأت ألبس مقفول .. ولبست بيجامه عليها قمر كده فضلت وقت الصحيان البسها علشان هى بقت مقتنعه جداً ان القمر دلوقتى نايم على البيجامه وان احنا بنرضع بس وقت مالقمر بيكون موجود بالليل .. وبدأت لو هى منزعجه جداً احدد اننا نرضع فسرير اوضة النوم فقط .. الى فبيتنا مش اى سرير بره .. بدأت الحمد لله تتخلى عن الرضاعه طول ماهى بره البيت .. وقعدت اسبوع كده من كتر مابحاول اشغلها علشان مانضعفش ونرضع وقت الناب .. مكنتش بتنام ناب الا لو فعربيه مثلا .. وده ساعدنى فالوقت ده انها تنام بعمق شويه بالليل وتقلل فى عدد رضعات الى بتكون خلال النوم لانها كانت بتصحى كل ساعه .. لحد ماتعودنا ان الرضاعه بالليل بس على السرير ووقت النوم فضلنا كده اسبوعين لحد ماتعودنا خالص..

بعدين فالنص حصل انتكاسه وطلبت رضاعه فى نص اليوم وانا كنت معاهده نفسى و معاهداها مكسرش قلبها خالص ..رضعتها اليوم ده كنت محبطه وفاكره اننا بنرجع خطوات .. بعت لدكتوره شروق قالتلى ماتقلقيش هى بتسنن وخليكى معاها واجلى الفطام .. وفعلا نويت كده وسبحان الله بنتى هى الى رجعت تانى ماتطلبش الصبح ..

بدأت بعدها اهتم بالعشا انه يكون تقيل وقبل النوم فبدأت تنام بعمق وبقت بتصحى بالليل مره واحده بس وبعدين بقينا بنعمل حاجات كتير اوى فاليوم لحد ماتقع فالنوم من كتر التعب ومترضعش رضعة قبل النوم ..

جيه بالصدفه كنا مسافرين وهنبات فى نفس الاوضه مع حماتى .. وكانت فرصه من ربنا انا مخططتلهاش .. قولتلها انه دلوقتى احنا مش فبيتنا ومعانا تيته فمش هنعرف نرضع للاسف هنا وممكن لو حابه اول مانرجع البيت نرضع .. قالتلى اتفقنا وطبعا اول يوم حزنت وكنت محتوياها جدا فهديت على طول .. والتزمت فعلا ٣ أيام من غير رضاعه خالص .. لما رجعنا البيت طلبت ترضع مره لمده يومين .. بعدين تالت يوم قولتلها انتى امبارح قولتى باى لل(ددا) هى مسميه الرضاعه كده .. زعلت كده لانها كانت قلقانه من النوم .. وده اكتر وقت الحقيقه بالنسبالى كان صعب .. قعدت اهديها وقولت لو قفشت جدا خلاص هرضعها .. بس اتشغلت بحاجه تانيه وسبحان الله من ساعتها مطلبتش ترضع تانى ..

وانتهت اول رحلة حب مابينا

فى حاجتين بالنسبالى كانو مهمين اوى انى اعملهم معاها ..

١- انى اهيأها نفسيا جدا وكنت بكلمها كتيييير عن الفرق بين الطفل الكبير والطفل الصغنن وده بيعرف يعمل ايه وكنت بوريها ده على قريبها او الاطفال الى بنشفهم ..

٢- هى لما كنا بنحط مثلا قاعدة اننا هنرضع بالليل او وقت النوم هى استبدلت الرضاعه بانها تقولى تدى للددا بوسه وحضن .. فبقت اى وقت محبطه ..زعلانه .. جعانه تجرى تقولى بوسه وحضن وكنت اسيب اى حاجه فايدى واستجيب لها الحقيقه ..

اخيرا بقى ..

الموضوع اكيد مش سهل ومحتاج صبر واستعانه بالله

و اخر حاجه لو قعدت اشكر دكتور شروق عمرى ماهوفيها المعروف الى هى عملتهولى وانها نورتلى بصيرتى كده فالموضوع ده وكانت دعم واخت والبال الطويل الى بيسمع شكرا انى كنت دايما بحس فى حد فضهرى لو أحبطت هيوجهنى صح

شكراً انك مخلصه كده ومحبه كده لشغلك والى محستش ولا مره انى بتعامل مع حد غريب