تجربة ناجحة:اتحلت مشكلة عدم زيادة وزن البيبى مع الاستشارة الأون لاين

.د.شروق حبيبت اشارك بتجربتي يمكن اكون سبب لدعم وتشجيع اي ام..
في بنتي الاولى كنت مفكرة ان الرضاعه ده حاجة سهلة جداا مش محتاجة مني لا قراية ولا اي مجهود كنت مهتمة بحملي وبس لما ولدت بنتي وبدأت ارضعها اتصدمت اي ده انا مش عارفه ارضع ازاي الوضع فعلا غريب ومش سهل لاني مكنتش اعرف اي حاجة..
سمعت لكلام اللي حوليا: ورضعي خليه يمسك الحلمة وهو هيرضع عملت كده وبعدها باسبوع الم رهيب وانا برضع كان شبه مميت كنت بكره وقت الرضاعه من الألم كنت بمسك دماغي والناس تقولي عادي استحملي فترة وهيروح
انسي نفسك دلوقت خلاص راحت عليكي
المهم للبيبي
ماكلنا اتوجعنا واستحملنا
كأن الناس كلها اجتمعت ع التنمر ع الام الوالدة بكمية احباط رهيب..
كنت بقول لنفسي ازاي
يعني ازاي رب العالمين يخلي الرضاعه بألم
لا اكيد في حاجة غلط ومكنتش مقتنعه ابدا بان لازم استحمل الألم
بدأت وقتها بس ابحث ولقيت مدونة د.شروق قد ليه مرجع اكثر من رائع لكل ام من قبل ما تولد..
وفهمت ان الم الرضاعه ده سببه وضع الرضاعه الغلط وفعلا كنت برضع غلط اتعلمت الوضع الصح ومكنش سهل في الاول بس كنت مصرة واستحمل الالم وعمري ما سيبت بنتي جعانه او بتعيط من غير ما ارضعها مهما كنت بتألم ..
بس للاسف كان الوقت اتأخر شويه لان الحلمة عندي نزلت دم وكانت خلاص هتتقطع روحت مباشرة لدكتور شروق وعلمتني ف العيادة الوضع الصح واخدت علاج وفي اقل من اسبوع كان في تحسن وعلى عشر ايام كانت الرضاعة مريحة جدااا ومفيش اي ألم ومكنتش بسمع لحد اللي يقولي ريحي نفسك وادي صناعي والي يقولي مافيش وضع رضاعه هي فطرة ..
بس اهم حاجة انك تكوني مصرة وتعافري واوعي تستسلمي ..
في بنتي الثانية مكنش عندي مشكلة خالص وضع الرضاعه مثالي مفيش الم اللبن كميته ماشاء الله كويسة وبنتي بتزيد فضلت كده 40 يوم تقريبا..
فجأة بقت بنتي تتعصب واوقات كثير ترفض الرضاعه وماتطولش لو رضعت كنت براقب الوزن وكان تمام لحد ما بدأ الوزن يتأثر قلقت جداا
حجزت استشارة تليفونية مع د شروق بسبب صعوبة خروجى مع الطفلين و سألتها و اتكلمت معايا و فهمت الحالة
فقالتلي اقرى في المدونة مقال زيادة اندفاع لبن الأم
وقللت المدرات فعلا
بعد استشارة د.شروق ربنا يباركلي فيها قد ايه كان الحوار الهادي اللي بيرفع من روحي المعنوية ويشيل قلقي من كلمة واحدة ..
ولفتت نظري بردو للارتجاع وروحت لدكتور الاطفال بتاعها وبناخد علاج للارتجاع وكمان بغير اوضاع الرضاعه باستمرار لحد ما ترتاح هي وتقبل بوضع ..
وممكن اتمشى بيها عشان تهدى وترضع واظبط المنبه بليل عشان اصحى وارضعها وهي نايمة لانها بتكون اهدى ..
اللي عاوزة اوصله انه ممكن يكون الوضع متعب وفي قلق بس قد ليه لما تحسي انك ام عظيمة بتقدمي اجمل هدية لاولادك ده بيفرق كثير ..
وعمري ما حسيت اني تعبانه من قلة النوم لان حبي ليهم اعظم
اوعي تيأسي لو واجهت اي مشكلة هتقدري ترضعي ماتستسلميش اقري وابحثي وارجعي لاستشارية رضاعة ..

من وجهة نظري انا مفيش سبب في العالم ده يخلي اي ام ما ترضعش طبيعي كل مشكلة وليها حل باذن الله