تربوى:الدعاء:ازاي اقنع طفل صغير إن إجابة الدعاء مش شرط دايما عبارة عن تحقيق نفس الدعوة بعينها فقط

ازاي اقنع طفل صغير إن إجابة الدعاء مش شرط دايما عبارة عن تحقيق نفس الدعوة بعينها فقط، و ف نفس الوقت إزاي أفضل رابطة في ذهنه إنه كل ما يحتاج حاجة يلجأ لربنا فقط؟

✏قلنا قبل كدة إن الطفل لازم يعرف إن صور إجابة الدعاء تلاتة:
1-يا إما تتحقق زي ما هي..
2-يا إما يتحاش عنه بالدعوة دي ضرر معين كان هيصيبه دون تحقيق الدعوة بذاتها..
3-يا إما بتتحوش له للآخرة..
و قلنا إن غلط إن الأم عشان تحبب الطفل ف ربنا تقول له "ادعي ربنا يجيبلك حاجة حلوة يا حبيبي"، و تقوم حطاهاله بالليل تحت المخدة حاجة حلوة يصحى الصبح يلاقيها.. قلنا دة غلط لإن كدة بنعلمه إن صور إجابة الدعاء هي واحدة فقط و بالتالي بنعرض عقيدته وإيمانه للفتنة عند عدم إجابة الدعوة بتاعته بعينها.
فلازم تعلمي ابنك التلاتة دول وطبعا تغرسي جواه إن كل ما الدعوة اتحوشت له للآخرة كل ما المفروض يفرح أكتر.. واربطيله دة بآية أو حديث.. مثلا "والآخرة خير وأبقى"..

💭💭 طب ازاي أعلمه دة؟
✏أولا عن طريق إني اخاطب المنطق جواه بالحقيقة النقية بكل بساطة #وهو_دة_تبسيط_المفاهيم .. حتى لو سنه 5 سنين؟ آه.. طالما بكلام بسيط، هو هيخزن و يفهم على أده إن شاء الله.. وبالتكرار مخه وقلبه هيستوعب..
طب إيه هو بقا المنطق اللي هخاطبه بيه دة؟
كالآتي:
1. الجنة هي اللي "لهم فيها ما يشاؤون".. الدنيا مش كدة.. "قل متاع الدنيا قليل".. يعني الدنيا مش دايما على مزاجنا.
2.لو كل حاجة طلبناها يا حبيبي اتحققت لنا=كدة هننسى الجنة.. وبالتالي هنبطل نشتغل ونجتهد عشان نكسب الجنة.. يعني عدم تحقق كل امانينا في الدنيا دة لمصلحتنا..
3. لو الدنيا بقت اوقات كتييير على مزاجنا هنتعب لما تبدأ تقلب وشها و تحرمنا.. و دة ممكن يخلينا نكره الحياة و نغضب من رزق ربنا لما يقل..
4.الانسان اللي عنده كل حاجة مش بيحتاج حد.. والناس لبعضيها.. ربنا جعل كل انسان عنده حاجة مش عند التاني عشان الناس تتعاون مع بعضها في الامور الناقصة عند بعضها..
5.الانسان ساعات بيطلب حاجة مضرة له و هو مش عارف.. او فيه احسن منها و هو مش عارف، عشان كدة بيستعجل دايما ان دعوته تتلبى زي ماهي و دة مش دايما في مصلحته... "و يدعو الإنسان بالشر دعاءه بالخير.. وكان الإنسان عجولا"..
6.الدنيا ربنا عملها عشان يمتحننا في امور كتير فيها عشان يشوف احنا نستاهل الجنة والا لأ =مثلا: هل لو ما استجابش لدعاءنا كله هنبطل نحبه؟ هل لو ما اداناش الحاجة اللي احنا عاوزينها هنحاول ناخدها بالحرام والغلط ومن غير وجه حق؟ هل لو ربنا ما ادالاكش دعوتك بعينها هتفضل مؤمن بحكمته و عدله و رحمته بدون شك؟ هل لو ربنا ما اديناش الحاجة دي هنبطل شغل و اجتهاد للجنة؟.. للأسف يا حبيبي فيه ناس بتبعد عن ربنا لما مش بيعمل لهم اجابة الدعوة بعينها.. و الشخص دة بتبقى خسارته كبيرة اوي.. "ومن الناس من يعبد الله على حرف.. فإن أصابه خير اطمأن به.. وإن أصابته فتنة انقلب على وجهه.. خسر الدنيا والآخرة.. ذلك هو الخسران المبين"..
7. الانسان اللي بياخد كل حاجة بيبقى متكبر و مستغني بنفسه.. و دة ممكن يخليه يبعد عن ربنا "كلا إن الإنسان ليطغى=أن رآه استغنى".
8.الإنسان إللي عنده كل حاجة مش بيحس بالمحروم والفقير والمكروب والمسكين.. والرحماء يرحمهم الله.

دي نماذج..
✏ثم ترسخي المنطق دة جواه عن طريق القصة او الأمثلة الواقعية بقا:
1.احكيله مثلا قصة فيها طفل او حيوان مثلا كل ما بيطلب حاجة من مامته بتديهاله، و بيني من خلال القصة سلبيات دة على حياة الطفل..
2.احكيله قصة الشرنقة اللي فضلت تدعي ان جناحها يطلع بسرعة بقا عشان تطييير وفضلت تعيييط ليل نهااار، لحد ما طفل كان معدي سمعها و راح مقشر لها الشرنقة عشان تطير وتفرح، فهي فرحت بقا و نطت برة الشرنقة ثم فجأة لقت نفسها مش عارفة تطير خالص للاسف.. مش بس كدة.. لأ كمان هتفضل كدة طول عمرها عاجزة عن حلمها بالطيران..
3.احكيله قصة طفل فضل بيزن على اهله عاوز العربية بالريموت دي يعني هي دي حتى لو بمصروفه اللي محوشه.... قام أهله جابوهاله بعد ما حاولوا يقنعوه ان فيه احسن منها طبعا في محل تاني.. المهم بعد يوم الولد شاف عربية احسن منها وندم جدا بس طبعا خلاص فات الاوان.. لان اهله طبعا -عشان ناس بتربي صح- كانوا قالوله ساعتها هي عربية واحدة بس اللي هتجيبها، وهو لانه كان مستعجل على اجابة طلبه بالظبط خسر الافضل..

💭💭ازاي ف نفس الوقت بقا اخليه متعلق فقط باللجوء لله في قضاء كل حاجاته؟
✏بالممارسة العملية والقدوة:
1.هتوريه ببساطة انك دايما رابطة اي فعل بإرادة ومشيئة الله: "ان شاء الله" .. "بإذن الله".. بس خدي بالك استخدميها بحرص.. عشان ما يستقرش في ذهنها ان معناها "لأ". و لو دة حصل و ابنك بدأ يضايق لما تقوليله إن شاء الله، قوليله: **يا حبيبي انا ما اقدرش اقول على اي حاجة الا ان يشاء الله لإن ربنا أمرنا بكدة في القرآن -وافتحي المصحف على سورة الكهف وشاوريله عالآية: "ولا تقولن لشيئ إني فاعل ذلك غدا إلا أن يشاء الله".. انا يا حبيبي نيتي اننا نروح النادي او نجيبلك الحاجة الفلانية، و سألت بابا لقيته موافق، لكن ممكن بعد كل دة ربنا ما يأذنش بكدة لحكمة هو يعلمها و الخير كله في قدر الله لينا..**
2.كمان هتوري ابنك انك فقيرة زيك زيه تمام، بتدعي ربنا لإنه هو الملك الغني وكل الناس فقراء إليه.. و ان انتوا الاتنين -انتي وابنك- بشكل فعلي وعملي يوميا ما لكوش حد تطلبوا منه الحاجة اللي محتاجينها سوى الله، لإنه هو اللي بيدي الناس كلها..
3.هتوريله انه لما بيطلب منك حاجة بتقوليله "ادعي ربنا" و نبقى نشوف.
4.لما بتجيبيله حاجة طلبها منك هتفهميه ان دة رزق الله مش انتي هتقوليله مثلا "الله على رزق ربنا ❤، شفت ربنا كريم ازاي؟".
#ببساطة #ونقاء_منهج
#تبسيط_مفاهيم_للأطفال 1
#الدعاء
أسماءمحمدلبيب-أسماءأمةالله