تربوى :بنتى بتقولى شعرى وحش.سارة سيف

اقول ايه لبنتي يا ساره لما تقولي انا شعري وحش 😣

انا بقعد اقولها ده جميل وكل خلقه ربنا جميله 😣😣
بس برضه مفيش فايده ترجع تقولي ده وحش
ازاي اخليها تثق في نفسها 😥

اممم
طيب ركزوا معايا
عندكم سيناريوهات كتير
اول سيناريو زي الام دي ما قررت هي تقولها وحش والام تقولها لا مش وحش
اكن البنت دي مش بتفهم او رايها مش مهم والام بتفهم اكتر منها وده ممكن جدا يخلي البنت تحس بفجوه بينها وبين مامتها وانها مش فاهماها وتبطل تحكيلها عشان دي طبيعه البشر ليهم عدد محاولات في كل حاجه بعدها بيجربوا حاجه تانيه عشان يوصلوا لاهدافهم ☺

وعندك سيناريو تاني
هروح عند الكوافير اعملهولك بروتين وبصراحه انا بتخض من الفكره مش عشان ان بدرى اوي شعرها يتبهدل كيماويات بس كمان بحس ان دي نواه ان البنت تتعلم انها لازم توصل للكمال في شكلها وتفضل طول الوقت اثيره عند صالونات التجميل اللي مع الزمن تتحول لعماليات تجميل وعمرها ما هترضي لان الجمال ملوش اخر كل ما هتوصلي لنقطه هتدورى علي اللي بعدها في ناس بيوصل معاهم الموضوع للهوس والامراض النفسيه بجد 😣

وعندك سيناريو تالت
انا كنت كده واحلو 😂
الاطفال عموما صعب عليها تتخيل خبره الكبار فلو حتي قررت انقل خبره مهم جدا انقلها بتفاصيل كتير وتبقي تفاصيل حقيقيه فيها الوحش والحلو بلاش دور دكتور التنميه البشريه يطلع عليكي 😂عايزه تنقلي خبرتك انقلي تريقه الولاد عليكي وتعليقات طنط عنايات اللي مكنتش بتعجبك ومشاعرك واحاسيسك بعدها وردود افعالك في كل مره وفي الاخر الحل

طريق بيني وبينكم صعب ومضمنكوش 😂تحطوا التاتش بتاعتكم وتحسسوهم بنظريه المؤامره الا لو هتحكي الموضوع بموضوعيه من غير drama 😦

وفي حل التربيه الايجابيه اللي هتحفظيه معايا ويمشي معاكي مع كل انواع المقارنات اللي طفل بيقارن فيها نفسه بالاخرين
والليكم خمس خطوات عمليه وعميقه وعلميه ☺☺

١-متفترضيش ☺

يعني لما بنتك تقولي شعري وحش متفترضيش انها تقصد كيرلي او منكوش يمكن قصدها التسريحه يمكن قصدها وحش عشان بيدخل في قفايا من اهم مهارات التواصل
الفضول
الفضول
الفضول والرغبه في الاكتشاف
خليكي فضوليه انك تعرفي ابنك او بنتك يقصدوا ايه 😃

٢-asking versus telling

كل ما تقول حاجه اسئليها اكتر لحد ما كل اللي جواها يطلع
لما الطفل بيتكلم وهو قلقان او متضايق اللي بيقوله ده بيبقي غالبا اول طبقه ولسه في مدفون كتير جوه طلعي القتيل عشان يزيح اللي جواه ويخرجه لان كتمان الحاجه اللي مضيقانا بيضعفنا وبيخلينا حساسين
امثله للاسئله :

تقصدي ايه بوحش ؟

طب حسيتي كده امتي ؟

طب الشعر الحلو بالنسبالك عامل ازاي ؟

طب لو ده مش متاح ممكن تعملي شعرك ازاي عشان تبقي راضيه ؟

طب تحبي نجرب نتفرج علي النت يمكن نلاقي تسريحه تعجبك ؟

طب دلوقتي رايك ايه ؟

الاسىله دي مش لازم الطفل يبقي عارف اجابتها كلها ولا مهم اصلا ان الاجابه تبقي صح ولا تبقي حل
المهم ان الطفل يطلع اللي جواه ويبتدي يشوف ان في وجهات نظر تانيه في الحياه فمع الوقت يبقي متفتح وقوي ومش بيعيش دور الضحيه لما تحصله مشكله بيبقي بيفكر ويجرب ويستكشف بصرف النظر عن النتايج
تاني بصرف النظر عن النتايج احنا علينا السعي والنتايج دي بتاعت ربنا لان السعي في حد ذاته بيعلمنا خبرات كتير ممكن تنجحنا في تجربه تانيه اصلا ويبقي ده رزقنا من التجربه دي انها علمتنا الحاجه دي 😊
We never lose we always win
عجبا لامر المسلم كل امره له خير 😍😍

٣-no one is perfect
الكمال لله وحده مهم جدا ان الام ميبقاش عندها مشكله ان شعر بنتها يبقي وحش اصلا ايه المشكله لو شعري بمقاييس الموضه دلوقتي مش احسن حاجه ايه المشكله فعلا ده مهم ان القاعده دي ميبقاش همك انك تقنعيها انها perfect القاعده دي اهميتها انك تبقي جنبها في الاوقات اللي بتبقي محتاجه تفضفض عن احبطاطها مفيش طفل معندوش معاناه في حياته في جنب او اكتر المعاناه دي اهم بكتير من الحاجات اللي هو كويس فيها لان الحاجات الناقصه هي اللي بتنضج الشخصيه وتخلي عندها خبرات وتزود الشطاره والمرونه والتقبل والثقه في النفس اه والله المعاناه اللي هزه ثقته في نفسه دلوقتي هي هي اللي هتكون السبب في ثقته بعدين 😍
ده بيوصل لما الام تحسسه انها فاهماه مش مشفقه عليه

بيوصل لما تقوله حاسه بيك وتعامله بحنيه من غير ما تقدمله حلول جاهزه لمشكله ممكن تبقي وقتيه جدا جدا وبكره الصبح ينساها

٤-متكبريهاش في مخه 😊

كتير جدا لما ولادنا بيجوا يشتكوا من حاجه بنقلق جدا
نركز معاها
نسئله عنها كل شويه
نكلمه فيها
وكل ما تتكرر نتصدم ونعيش الدور بقي مع ان كل حلولك دي خارجه من انفعالك من المشكله مش حل حقيقي واقعي وعملي

حضرتك احنا مش بنفكر في حلول غير لما المشكله تتكرر
تبقي ماثره علي حياته او علي الاخرين فعلا مش مجرد تخوف انها ممكن تاثر 😊

وقتها بقعد مع الطفل قاعده واسئله عن اقتراحاته واحط اقتراحاتي ونكتبها ونعلقها
عشان لما المشكله تتكرر منتكلمش بقي فيها تاني نختار من الحلول ونشجع الطفل انه يحل لان الانسان بطبعه بيميل بالشكوي اكتر من الحل
واديله وقته في ممارسه الحلول في دروس في الحياه عشان نتعلم منها بتاخد سنه واتنين مش مره ولا اتنين
افتكري تاني مميزات السعي وانه بيعلم في حد ذاته
واشكريه ابنك علي اي خطوه ايجابيه حتي لو كان الشكر ده علي انه سمعك
جرب تسريحه
دور معاكي علي النت

٥-اشغلي وقتك

كتير من الامهات حياتها هي ولادها بس وده بيخليها تركز اكتر مع اي نقص في حياه ولادها بشوفها كتير الولد ولا في دماغه وهي اللي منهاره وعماله تدور علي حلول لموصوع ابسط من البساطه 😍

هيحصل ايه لو خدتوها ببساطه هيحصل ببساطه اطفال منطلقه
بيحبطوا اه بس ما بيتعقدوش
بيشتكوا اه بس مش بيلفتوا الانتباه ويعتمدوا علي غيرهم بالشكوي
بيعانوا اه بس بيعرفوا يستمتعوا ببقيه جوانب حياتهم

احنا منقدرش نحمي ولادنا من المعاناه
منقدرش نخليهم perfect ولا ملايكه
بس نقدر نقبلهم ونقبل حياتهم بكل ما فيها عشان هو ده الواقع
مش هيتغير لو انكرناه
مش هنقدر نشوف نص الكبايه المليان الكبايه فيها حته فاضيه وحته مليانه واافاضي هيعلمنا اكتر من المليان
مش دورنا اننا نكملهم دورنا اننا نطورهم 😍
بحبهم بكل ما فيهم بحبهم زي ما اللي خلقهم حبهم ورزقهم وقدرهم وكرمهم واستخلفهم في الارض بكل ما فيهم 😍

ويبقي الاثر
#ويبقي_الاثر