تجربة ناجحة فى علاج رفض الرضاعة

 

 

إبني الحمد لله كان بيرضع رضاعة طبيعية مطلقة عمره ما داق ببرونة ولا حتي فيها لبن متعصر. 

وزنه كان بيزيد طبيعي ومكانش عندنا أي مشاكل في الرضاعة نهائي. 

وهو عنده 11 شهر كان متعلق جدا بالرضاعة لدرجة كانت مزهقاني أنا شخصيا. فجأة لقيته قعد حوالي 3 ساعات مش بيطلب ودا كان وقت كتير جدا إنه يقعد فيه من غير رضاعة ،بعرض عليه لقيته مش راضي خالص يرضع. 

مش بيعيط ولا أي حاجة بس حاطه في بقه ومش بيمص أو يمسكه ويسيبه برضو من غير ما يمص. 

استنيت بالليل قلت يمكن وهو نايم يرضع لإن الليل دا كنا بنقضيه كلللله رضاعة. فضلت صاحية للساعة 2 مستنياه ينام كان مستحيل طبعا ينام غير علي صدري ،أعرض عليه برضو ولا الهوا مش راضي يمص مصة واحدة. 

فضلت طبعا طول الليل بعيط وصحيت ماما عشان كنا قاعدين معاها اعيط لها قالت لي معلش يمكن فطم نفسه ودا طبعا خلاني انهار في العياط لأني ناوية مافطموش أبدا غير علي سنتين عشان يرضع رضاعته كاملة. 

فضلت صاحية لحد الصبح مستنية الدكتور يفتح وقعدت أدور على النت كتير بالعربي ما لقتش حاجة فادتني لحد ما لقيت فيديو علي يوتيوب لواحدة أمريكية بتتكلم عن نفس الموضوع وبتقول إن دي حاجة إسمها إضراب عن الرضاعة بيحصل للأطفال في أي سن وأسبابه ممكن تكون عضوية زي إن زوره واجعه أو عنده فطريات في بقه أو أسباب نفسية زي حمل الام أو النقل لبيت جديد والحل الوحيد هو صبر الام وانها تعرض علي ابنها الرضاعة كل شوية منهم غير ضغط وتهدي نفسها. 

بدأت أفكر إن ممكن السبب يكون نفسي لأن جوزي كان مسافر وآنا جيت عند ماما البيت وابني كان متعلق بباباه ومش متعود علي بيت ماما بس قلت برضو اكشف له. 

أول مالصبح جه رحت للدكتور صحيته من بيته عشان يكشف علي بقه قالي مفهوش أي حاجة ونصحني برضو إني ماستلمتش وأفضل أعرض عليه كل شوية الموضوع ده استمر معايا 3 أيام واربع ليالي كانوا من أسوأ وقت عليا في حياتي وابني كان صعبان عليا جددددا. 

هو مكانش بيعيط ولا بيطلب رضاعة ولا أي حاجة بالعكس كل شوية احطه علي صدري ساعات يرضي يمسكه بس طبعا مايمصش ولا مصة وساعات ما كانش بيرضي حتي يمسكه أقعد احضن فيه وبعدين اسيبه عشان اعيط بعيد عنه لأن مينفعش يشوفني وأنا بعيط.

 وكل إللي جاي يصبرني يقولي معلش فطم نفسه وريحك من الفطام وأنا طبعا الكلام ده بيزود حالتي لأني مش عايزة افطمه أصلا ولا ناوية علي فطام دلوقتي ربنا هداني للدعاء عرفت إن مش إدامي غير ربنا والصبر وأني ادعي واقرا قرآن وفي نفس الوقت أعمل إللي الدكتور قال عليه وهو الهدوء والعرض عليه كل شوية من غير ضغط 

قرأت سورة البقرة كلها علي ازازة ماية وبقيت كل شوية أشربه منها وادهن منها علي صدري واحاول برضو اعرضه عليه لحد في رابع يوم بالليل لقيته مسك ومص مصتين آتنين بس المصتين دول طبعا كانوا بالنسبالى فرحة مش ممكن تتقدر.

 بعدها بشوية استنيت لما نام خااالص واديتهوله والحمد لله رضي يرضع رضعة كاملة ومن أول اليوم الجديد رجع تآني يرضع طبيعي زي ما كان. 

أها خلال الفترة دي كنت بعصر لبني عشان ماينشفش وكنت بديهوله في كوباية ساعات يرضي ياخده وساعات لا بس أنا كان هدفي اللبن ماينشفش وكمان كان صدري طبعا فيه وجع رهيب من تحويش اللبن فيه. 

إلي عايزة انصح بيه أي أم يحصل لها كده إنها ما تتخضش أو تستسهل وتقول خلاص هفطمه قبل ما يتم سنتين ،الموضوع دا ممكن يستمر لمدة أسبوع ويرجع الطفل يرضع تآني فمحتاحين بس صبر ولا إنك تحرمي ابنك من رزق ودوا ربنا بعته له عندك ، ليه تحرمي نفسك من حضن ابنك ورضاعته منك عشان تريحي دماغك 

دول هما كلهم سنتين ومش هيرضع منك بعدها أبدا يجو إيه الكام شهر زيادة إللي هترضعيه فيهم في عمره ولا في عمرك ؟ هما بس هيفرقو معاه في إنه يحبك آكتر وإن صحته تبقي كويسة ومناعته و ذكاؤه وكل حاجة فيه تبقي أحسن