تجربة ناجحة:ارضاع التوأم بنجاح

تجربتى فى ارضاع اولادى التوام كانت جميلة اوى

كانت متعبة  بس بصراحة علمتنى الصبر وقوة التحمل 

اولا انا ربنا رزقنى بتوام احمد وعمر بعملية قيصرية وبعدها انا كنت 

تعبانة جدا لدرجة انهم نقلولى كيسين دم لان نسبة الهيموجلوبين كانت وصلت 6ونص وكنت كل ماقوم من السرير ادوخ وانا بصراحة كان كل همى انى اقوم بسرعة عشان ارضع ولادى قبل ماياخدو على الببرونة اللى ماما كانت بتديهالهم وانا فى المستشفى 

 فبدات فى اليوم التالت احاول احط واحد واحد يرضع بالتبادل بس كانو بيرضعو شوية صغيرين وينامو 

لكن انا كان كل همى انهم يعرفو يرضعو منى باى شكل خصوصا ان انا كان لية تجربة مع اختى اللى  دكتور الاطفال قالها وهى لسة فى المستشفى تعمل لابنها رضعة صناعى كل ساعتين وتزود الكمية بالتدريج وبعد ماطلعت من المستشفى بدات ترضع ابنها طبيعى لكن الولد ماكانش بيصبر وكان يصرخ وكانت تضطر تديله الصناعى

 وبداو طبعا كالعادة يقولولها اصل انتى لبنك قليل لحد مالولد اخد على الصناعى وماقولكوش اد ايه مناعته ضعيفة ودايما تعبان وبقى يجيله حساسية على صدره

 المهم انا بقيت حريصة ان دة مايحصلش وفعلا الحمد لله لما روحت تقريبا كان رابع يوم بدات احس باللبن بيزيد والولاد طبعا وقفتلهم الببرونة على طول بس ماكنتش بانام لانى كنت ارضع واحد وبعد ماينام كان التانى يصحى فكنت اخده ارضعه وهكذا بالتبادل 

وكانت المشكلة الكبيرة لما يصحو الاتنين مع بعض كنت ساعتها عند ماما 

كنت باخليها تاخد واحد تحاول تسكته عقبال مارضع اخوه او تديله رضعة اعشاب

 وبعدين شفت د شروق  وعلمتنى ازاى ارضع الاتنين فى وقت واحد وماما كانت بتساعدنى 
الحمد لله حسيت انى كدة بدات ارتاح شوية عشان كانوا فى اوقات كتيرة بيبقو نايمين مع بعض وعلى فكرة كمان حسيت ان اللبن بيزيد وفضلت كدة لحد تانى شهر 

وطبعا خلال الفترة دى لازم كل واحدة تيجى تزورك تقولك ازاى لازم واحد تكمليلهم بصناعى دة كدة مايشبعوش وطبعا الكلام دة كان بياثر فى ماما وتقولى هى كمان كدة وانا بقيت اخاف احسن يكونو فعلا مش بيشبعو بس كنت بقاوم لحد الشهر التانى دة بدا الولاد ييجو فى الليل يرضعو كويس اوى بس مش عارفة ليه يقومو من الرضاعة يعيطو من الساعة 21 باليل لحد الساعة 8 الصبح قلت يمكن مغص واديهم حاجات للمغص ومفيش فايدة 

بدات ماما تزعقلى وتقولى لازم تديهم رضعة باليل وانا بقيت مش عارفة اعمل ايه 

بس كنت اكلم شروق كانت تشجعنى وتصبرنى انى اثبت على موقفى وقعدت تقوللى على دلائل كتير تدل ان لبنى بيكفى الولاد بدليل ان هما وزنهم بيزيد

 المهم برضه قلت اريح ماما وكنت اخليها تعمل رضعة للولد اللى كان يعيط اكتر بس كنت بارضعه الاول فكان ياما ياخد الرضعة او يرفضها وبرضه كان يفضل يعيط للصبح وبالتجربة عرفت ماما ان السبب مش ان الولاد جعانين ولاحاجة 

بس فضلو كدة يسهروا طول الليل وينامو طول النهار لحد الشهر التانى دة ماعدى 

وبدا الموضوع يقل شوية شوية لكن اضطريت انى ارجع البيت لان ماما سافرت وطبعا المشكلة هنا ان الزوج صعب انه يتحمل عياط الاطفال

 المهم بقيت بقدر الامكان اقفل على نفسى الاوضة عشان مايسمعش العياط وكنت قليل اوى لما اخليه يساعدنى 

وهو صبره نفد وبدا  يحكى لمامته وهى بقى كانت ترد عليه وتقوله ايه اللى مراتك بتعمله دة 

دة العيال دى مش بتشبع دول مابيكبروش 

هو فى حد بيعمل كدة اى واحدة معاها توام لازم تكملهم بصناعى او على الاقل رضعتين صناعى فى اليوم 

دة كل اللى بيجيبو توام بتدى واحد لامها يرضع صناعى عشان هى مابتقدرش ترضع غير واحد 

المهم طبعا ييجى يتخانق ويزعق العيال جعانين حرام عليكى لازم قبل ماينامو تعمليلهم رضعة قلتله حاضر واضطريت انى اعمل الرضعة اليومية وساعات كنت اطنش بس هو كان بيعملها بنفسه ويجيبهالى 

والحمد لله كام يوم كدة والوضع زى ماهو لحد ماتاكد ان موضوع الرضعة دة مالهوش لازمة

 كنت مجهدة جدا بس كنت باحتسب دة جهاد فى سبيل الله بالاضافة انى كنت سعيدة جده انى الحمد لله ربنا مقدرنى وعلى فكرة انا كنت لما اخرج واسيب الولاد شوية مع ماما كان اللبن يسرب منى ومع ذلك برضه كانت حماتى تقول اصل هى لبنها خفيف مش بيكبر العيال 

 وكمان شغلى كنت باروحه مرة واحدة فى الاسبوع لحد مابقو خمس شهور بدات ادخلهم الخضار المسلوق  

وطبعا الزن على الزبادى كان من الشهر التالت بس انا كنت بارفض . بس الحمد لله كانو مرتبطين بالرضاعة اوى والحمد لله المرات اللى تعبو فيها وخدو ادوار برد او سخونة كانت قليلة جدا وماشاء الله ما اذكر ان واحد فيهم اخد دور اسهال او ترجيع الا يمكن عمر ابنى مرة واحدة جاله اسها ل ورجع فى الليل بس الحمد لله تانى يوم خف وكان دة فى بداية الاكل والحمد لله كملت رضاعتهم سنتين 
و هما دلوقتى عمرهم 3 سنين ونص والحمد لله دور البرد مابيطولش عندهم اكتر من 3 ايام والحمد لله الفضل لربنا ولنعمة الرضاعة الطبيعية اللى كتير من الامهات مش حاسة باهميتها

ما شاء الله لا قوة الا بالله