ليه بقينا محتاجين استشارى الرضاعة الطبيعية

السؤال ده بيتسال كتير و حبيت ارد عليه بوضوح
ليه بقينا محتاجين استشارى رضاعة
ما الستات طول عمرها بترضع بسهولة من غير متخصصين؟
الحقيقة ان الستات (كانت)بترضع بسهولة من غير متخصصين
دلوقتى مع تزايد القيصرية(مصرمن اعلى النسب فى العالم للولادة القيصرية)
و مع اصرار المستشفيات على الاحتفاظ بالطفل فى الحضانة لغير ضرورة(لاسباب .........)
بقت الرضاعة صعبة
و ليها مشاكل كتير
فالعلماء ابتكروا حلول و اوضاع للرضاعة للحل
مكنتش موجودة قبل كده
و مكنش لها مسميات طبية
و علاجات لالتهابات مكنتش شائعة و اصبحت شائعة
و علاج لرفض الثدى اللى كان حالة نادرة و بقى الشائع
و علاج مشكلة زيادة اللبن اللى مش بتتشخص و كتير بتكون احد اسباب رفض الثدى
و يقال للأم خد هيربانا علشان تزود اللبن و هيا بتعقد المشكلة
و مع الوقت لزم وجود متخصصين الامهات يعرفوا يوصلوا لهم
فتم ابتكار اسم استشارى الرضاعة الطبيعية
لو حليتى مشكلتك لوحدك خير و ممتاز
بس لو معرفتيش العلم بيقدملك حلول و علاج
و الابحاث دورت على حل للام اللى والدة قيصرية و اللى عندها الم فى الرضاعة و للى ابنها اتعود على الببرونة و رفض مامته

ايه هيا دراسة استشارى الرضاعة؟
يدرس استشارى الرضاعة بالاضافة الى تخصصه الأصلى مراجع الرضاعة الطبيعية المعتمدة من البورد الأمريكى للرضاعة الطبيعية
و يجرى امتحان لاستشارى الرضاعة على مستوى العالم نفس الامتحان فى نفس الوقت .

هل يستطيع طبيب الاطفال مساعدتى فى حل مشكلات الرضاعة الطبيعية؟
بعض اطباء الاطفال الذين يحبون الاطلاع على الجديد تلقوا بعض التدريب على برامج دعم الرضاعة الطبيعية من وزارة الصحة او غيرها
و البعض الاخر لم يتلقى هذا التدريب
و هذا لا يعيبهم
فكل طبيب يسأل فى تخصصه

هل زيارة استشارى الرضاعة مكلفة؟
هناك الكثير من العيادات المجانية و ننشر عناوينها تباعا فور الحصول عليها
و هناك مجموعات دعم للامهات
و يمكنك مراسلة الادمن لتلقى عناوين مجموعات الدعم حيث انها ما زالت حديثة و ليست اماكنها متاحة كلها حاليا

مثال الصورة دى
امهات كتير بتجيلى العيادة بترضع زى الصورة اليمين
و اتفرجت على الفيديوهات و معرفتش تطبق
الحلمة نصها بره و الهالة كلها بره و الطفل بالتالى بياخد لبن قليل
و طبعا هيا موجوعة لأن الحلمة اكتر حتة حساسة فى الجسم بس الهالة مش زيها
ليه تقعد تتعذب و تعذب ابنها و اللبن يقل
نتمنى نكون قدرنا نساعدكم و نساندكم نفسيا و عمليا
باختصار:
ايه السبب فيه استحداث وظيفة استشارى الرضاعة الطبيعية؟
الحاجة ام الاختراع
1- انخفاض نسب الرضاعة الطبيعية الى 13% عند 6 شهور و دى نسبة كارثية
2- زيادة امراض الاسهال و الجهاز التنفسى نتيجة قلة الرضاعة الطبيعية
3-زيادة معدلات رفض الرضاعة بسبب الببرونات و القيصرية و التخدير
4-زيادة معدلات الم الرضاعة
5- نسيان الامهات وضع الرضاعة ازاى لانها مش بتشوف حد بيرضع
6-ارتفاع نسب التهاب الثدى و انسداد القنوات اللبنية
7-احتياج الامهات الى الدعم النفسى للاستمرار فى الرضاعة
8- ارتفاع نسب اكتئاب ما بعد الولادة