تجربة ناجحة فى علاج ألم الحلمات الرهيب مع النزيف

السلام عليكم ورحمة الله وبركاته

بداية أحب اشكر الدكتورة شروق فى مساعدتها ليا فى تغيير هام جدا فى حياتى انا وابنى بانى ارضعه رضاعه طبيعيه بعد االاحباط اللى جالى من جميع الاطباء فلها منى خالص الشكر والتقدير والامتنان

بداية انا بدأ الالم عندى من ثالث يوم للولاده تقريبا بدأ الم بسيط وبعد كده زاد وحصلى التهابات فى الحلمه وتشققات وصديد ودم كنت بتابع مع دكتورة من اول يوم حسي بالالم ولكن الحاله كانت بتزداد سوء كل مرة تغير لى المراهم والكريمات والمضادات الحيوى والحلمه الصناعى ومافيش فايده

جربت كل حاجه تقريبا لمدة 3 شهور والالم رهيب وروحت لدكتور تانى لما جالى الصديد اول مرة والدكتورة الاولى ماعرفتشى تعالجه نصحنى بشده انى اخد حبوب تنشيف اللبن وارضع صناعى رفضت طبعا

كده سافرت بورجع لى الصديد والتهاب الثدى مرة تانيه وثالثه ورابعه وكل مرة الدكاترة ينصحونى بشده انى ارضع صناعى لانى كمان كنت باخد مضادات حيوى باستمرار وفى خامس مرة الصديد كان فى الثديين الاثنين حاولت اديله صناعى على ماالصديد يقل شويه رفض بشده وقلبى وجعنى قوى وبقيت انا وهو بنبكى وزوجى كمان نفسيته تعبت جدا عشانا 

وفى يوم شوفت موضوع للدكتورة شروق
ارسلت لها و تابعت معاها اون لاين
فى البدايه عرفتنى ان اكبر مشكله عندى هى طريقة الامساك الخطأ للثدى وبعتت لى موقع الدكتور جاك نيومان وعرفت الحمد لله الطريقه الصحيحه الالم قل شويه لكن كان لسه فيه التهاب فى الثدى وتشققات ودم

قالت لى على تركيبه عملها الدكتور جاك لعلاج جميع الم الحلمات

مش هكذب عليكم لو قلت لكم انى بدأت احس بتحسن كبير حتى من قبل مااستعمل التركيبه

بسبب تشجيع الدكتورة شروق واعطائها امل ليا انى ممكن اتحسن وارضع طبيعى ان شاء الله

وماذكرتشى نهائى اللبن الصناعى 

ده اعطانى راحه نفسيه كبيره

طبعا تعبت معايا جدااااااااااااااااااااا فى تحضير التركيبه لانى لما سألت هنا فى الكويت قالوا مافيش حد هنا بيعمل تركيبات ففضلت انا اروح الصيدليه اشترى الحاجات اللازمه للتركيه وارجع اسألها ساعات الاقى الصيدلى مدينى حاجات غلط او بدائل المهم انى الحمد لله بفضل الله ثم الدكتورة شروق نجحت فى عمل التركيبه وخلال ايام بسيطه جدا الحلمه اتحسنت والالم راح الحمد لله

حقيقى انا مش عارفه اشكرها ازاى

لكن بقول لكل ام ياريت ماتستسهليش الصناعى وحاولى على اد ماتقدرى وبوجود الدكتورة شروق ان شاء الله مش هيبقى فيه اى مشاكل لأن مافيش اى شئ فى الدنيا اجمل من ضم طفلك لصدرك وارضاعه

جزاكى الله كل خير يادكتورة شروق وليكى بوسه كبيرة قوى من عبد الرحمن حقيقى كلنا ممتنين ليكى جدااااااااااا

استشيرى طبيب طفلك فى كل ما يخصه

هذه المقالة من باب المعلومات العامة و لا تغنى عن زيارة الطبيب