ام مرهقة

من يومين كنت ماشية بعيط في الشقة من غير سبب، مفيش منطق عاقل لمشاعري غير أني بعيط وبس !
ولكنه منتهي المنطق لمرادف أم مرهقة 😵
عايزة انام ومادلقش ستة الصبح للمدرسة وبعد ما اخلص استفتح بتغيير بامبرز وبعدين اشوف الاكل وتفاصيل الغسيل والبيت واللبس اللي صغر واللي هنشتريه للشتا والادوية اللي لازم تتاخد وافضل منكوشة ومجنونة بجري في ستين اتجاه ادوس علي المكعبات واحل واجب واعشي واحمي وانيم
فقرة الزن لوحدها كفيلة تجيب لاي دكتور نفسي اكتئاب ..
الستات ممكن تحكم العالم لمجرد أنها بتستحمل زن متواصل لفترات زمنية رهيبة 💪💪
امي لقتني قاعدة قالبة وشي .. بتقولي مالك ؟ قلتلها مرهقة .. نفسي البس كعب وانزل اكل سوشي .. مش قادرة استوعب كل تفاصيل الامومة القذرة دي 😂
قالتلي البصة في وش عيالك بالدنيا .. فبصتلهم وقلتلها عادي علي فكرة لسه مرهقة ونفسي البس كعب واروح هانم اتعشي سوشي .. فضحكت
بس امبارح بنتي وقعت علي السلم وقعة جامدة قدام عيني .. قلبي نط من جوايا واتوجعت واتحرق قلبي ..
في حاجة جوانا بتربطنا بالكائنات الزنانة المقرفة دي بشكل رهيب .. هما مصدر سعادتنا و تعاستنا
الكون كله أصبح بيدور حواليهم ..
كل يوم بيكبروا فيه بياخدوه من عمرك وبتبقي سعيدة ..
مع كل دمعة وكل وجع وكل ألم جواكي وكل اكلة سوشي وكل خروجة حلوة ضاعت .. في ابتسامة علي ملامحهم اتولدت
بصوا لعيالكم اوي .. احضنوهم جدا رغم الزن ووجع القلب .. العيال لا بتكبر بالفلوس ولا الهدوم ولا المدارس .. العيال بتكبر بالحب .. بتزرعي جواهم حب وبتحصدي أصدق كلمة بحبك هتسمعيها في عمرك كله مقرونة بأجمل لقب تعبتي للحصول عليه بشدة ..
" أنا بحبك يامامي " 💗 .. وبيهون كل التعب وبتنسي
#غادة_كريم