المودة و الرحمة

ممكن أقولكم مفاجآة؟ .. الحب مبيجددش نفسه لوحده!!
نفس عميق ووقت فاضي.. واقرأ على مهلك.. بننقذ بيوت هنا حضرتك 😊

تقريباً ثقافة المجتمع في الحب وقفت عند سندريلا لما عاشت في تبات ونبات.. او في فاتن حمامة وهى واقفة كل مغرب بتفتكره عشان حضرته طلب منها اذكريني وده بس عشان معرفوش يتجوزوا مش اكتر.. او في احمد نادية وهما بيحبوا بعض... لكن السينما جالها صمم عن نقل الشكل السوي للحب بعد الزواج... وطبعاً لازم دس السم في العسل .. وتصدير ان الحب بعد الجواز لازم ينهار ويختفي ويقلب بملوخية ليها وفانلة مقطعة له.. مع عيال بتصرخ!!

فنيجي بأة للحب بعد الجواز.. نلاقيه بعد كام سنة يدخل في غيبوبة... من كتر الإهمال! محدش كان عارف ان الحب بيخلص.. ايوة.. الحب اللي ساعدك تتجوز.. او حتى اللي اتبنى اول الجواز.. دي مرحلة بتهيأ لمرحلة اهم واعمق... مرحلة المودة والرحمة..

خليني اوضح لك بمثال تاني... احنا عندنا تصور ناقص ان ولادنا عشان احنا اهاليهم... واجب عليهم يحبونا!! والواقع ان في اطفال اول ما بيكونوا معتمدين على نفسهم بيطفشوا.. ومفيش حاجة بتربطهم باهلهم غير واجب البر .. ده لو مركزين في الواجبات والحقوق.. وده ليه؟ عشان اني اكون ام شىء.. واني ابني علاقة حب بيني وبين ولادي شىء تاني خالص!!... لأن الحب غير التعود.. والحب غير اطار علاقة موجودة فيه بس مش لاقية نفسي جواه!

فنيجي للجواز.. نلاقي الاتنين معتمدين على لقب زوج وزوجة وكأنه لقب كافي لإدارة الحب داخل هيكل العلاقة الزوجية... لا في رعاية للحب.. لا في تركيز في احتياجات الآخر.. لا في وعى بتغير المرحلة وكيفية التأقلم.. ولا اى بتنجان!!

ونستغرب اوي من ازمة منتصف العمر... ومن ركود العلاقة بعد اول عشر سنين... العلاقات وقتها بتمر بأزمات.. وفي بيكمل بس عشان العيال وبيعيش مطحون... وفي جرىء وبيقرر لو راجل يتجوز تاني..
ولو ست بتهد الدنيا عشان تعيش مع حد تحبه...!!والنتيجة خراب البيت عشان قلة الوعى والبحث عن سراب.. ايوة سراب... لان اى علاقة جديدة هتدخلها برضو لو اعتمدت على رصيد الحب في اولها مسيره يخلص... وتعاني تاني!!

طيب لتجديد الحب... لازم الاهتمام بجناحي المودة والرحمة::

١. المودة:

يعني التودد للطرف الآخر بما يُحِب!!! وربنا بما يُحِب .. مش باللي بحب انا اعمله !! صدقني كل تصرفاتك اللي بتعملها بناء على انها التصرفات اللي بتحبها انت.. مبتوصلش الطرف الآخر.. مبيحسش بيها!! بيحس انك عايش تبسط نفسك.. ما اللي بتحب تعمله ده بيصب في احتياجاتك.. فمش بيلمس مع الطرف الآخر.. كلام نظري يقولك قدر اى تصرف حلو من شريك حياتك... حضرتك لما الواحد بيحس ان اللي معاه بيتودد يسعده باللي يبسطه... ساعتها بس بيبدأ يشوف باقي التصرفات حتى اللي متلزموش.. ويقدرها.. وانت ساعتها هتنبسط عشان التصرف اللي بتحب تعمله اتقدر فتحس بحب انت كمان

يعني حضرتك عندك عربية .. هى موجودة... مبتتحركش.. بس موجودة.. لو عايزها تتحرك هتضطر تحط بنزين.. ينفع تحط ميا عشان بتحب الميا اكتر؟ ما هى مش هتتحرك.. بس هتفضل موجودة.. موجودة بس متربة ومتبهدلة ومش بعيد تحتاج تعمل صيانة عشان تعرف اصلا تحط لها بنزين... ولو فضلت سايبها ممكن تتسرق يا معلم 😎

وهكذا الحب... لو ماخدش البنزين اللي بيخليه يتحرك ويتجدد هيقف... وهيفضل موجود... بس مهمل.. وطبعا ده عشان هو مش عارف يتحرك بالميا اللي شغال انت حط فيها ومصمم انك كدة بتحب.. ويقلب تعوّد مش اكتر للوجود.. والتعود مش حب.. لانها علاقة ممكن تتبني بينك وبين قطة حتى!!

مثال: واحدة اتجوزت وقالوا لها لازم جوزك يرجع يلاقي الاكل جاهز ومتحضر بشكل جميل..ومغروف على الترابيزة ولازم مطبخك يبقى فلة .. اهتمت بده فعلا وهلكت في تنفيذ ده ... واكتشفت بعد فترة ان جوزها مش مقدر بل مضايق انها بتهدر طاقتها في كدة!! هو طلع احتياجه ابسط من كدة.. عايز يدوبك يغرف في طبق وخلصنا.. وكان بيشتكي انها بتسيبه وتقعد ساعة بعد الاكل تنضف المطبخ!! اتنين احتياجتهم معشقوش في بعض.. عشان بس هى قررت تتودد وتحبه بطريقتها.. وهو احتياجه انه يبقى معاها ومش بيحس بمود الخدمة والنضافة ده.. هى كان قصدها اهتمام وهو حس انه هملته شخصيا...

مقدرش الومه او الومها.. لكن اقدر اوجههم يفهموا احتياجات بعض ويلبوها.. كُتر تركيزك على اللي بتحب تعمله... الطريقة اللي بتحب تتكلم بيها.. الاسلوب اللي تسعد اللي حواليك بيه لو مبني على رؤيتك انت.. ومش مبني على احتياج الآخرين حواليك.. صدقني هينكروا انه اهتمام..

يبقى المودة يعني اهتمام باحتياجات الآخر.. وان اشعره بالحب بالطريقة الي محتاجها.. مش بطريقتي انا .. وهو يولع 😂

الرحمة:

دي بأة يا مؤمن وقت الضعف 😂... يعني وقت ما الطرف الآخر يكون موجوع نفسياً او عضوياً... او لما تشوف عيب فيه.. يبقى فيه رعاية نفسية ماليانة احتواء

رحمتك بيه لما تعرف انه حزين.. انه متألم لاى سبب انك تكون سند له.. تكون مصدر حنية واحتواء.. تكون متفهم.. تكون مستعد تسمع باهتمام للفضفضة.. وانك تغض طرفك تماما عن اى سوء خلق او تصرف ميعجبكش.. على انك تصلحه لما يقوم ويبقى اقوى فتقدر تتواصل معاه وتشوف حل...

بس وقت الضعف.. وقت السكون.. والشعور بالأمان... مش وقت اللوم والعتاب والتجريح والقفش.. ونفس الكلام وقت المرض هو محتاج منك تواجد.. حضن.. حنية اكتر من زعيق على الدوا.. الدوا مهم بس الشعور بالحنان في نفس الاهمية

ولما تشوف عيب في شريك حياتك... حاول انك متقفش ليه زى المراية المؤلمة تفضل توجعه بيه... قوّمه بالحكمة والموعظة الحسنة في وقت مناسب... وان لم يتغير.. ذكر نفسك ان كرهت منها خلق رضيت منها خلق آخر.. فمتفضلش مبين العيب ومكبره... مفيش انسان مفيهوش عيوب على فكرة!!

برعاية المودة والرحمة.. العلاقة الزوجية بتكون سكن وامان وراحة للزوج والزوجة.. وعدم الرعاية لاحتياجات الآخر... بيوصل للجفاء ولتشقق الحب وتصدع جدران العلاقة... فلازم رعاية لبناء الرحمة واهتمام لاشعاره بالود..

غير كدة بلح... وبتدن على خراب عشك 😂

#الحب_محتاج_رعاية_وربنا
#الحب_مبيكملش_لوحده
#زى_ما_حبيت_مرة_بتحب_تاني_برضو_عادي
#يبقى_نحافظ_على_الحب_بالمودة_والرحمة
#أزمة_حب
#هو_وهى