Wednesday, August 11, 2021

تجارب ناجحة فى الفطام و مقال اخصائية نفسية عنه

 تجربة ناجحة باتباع هذه النصائح

الرسالة دى جتلى و حبيت انشرها للفائدة
خليكى مصرة على الأكل الصحى
خليكى مصرة على الرضاعة الطبيعية
خليكى مصرة على التربية بالحب
 هتلاقى النتيجة اسرع ما تتصورى
اني اقدر اكون البنت الوحيدة بعيلتي ارضع بنتي سنتين كاملين بدون نقطة صناعي بالرغم من انها مولودة وزنها قليل
وبالرغم من ضغوطات اهلي كلهم اننا عيلة مش بترضع طبيعي
و اكتر كمية تعليقات سلبية سمعتها في حياتي تخليني انهار من زمن
لكن ادخل بس اقرا لحضرتك بوست او كلام احسه من القلب وخوف علينا وعلى اولادنا اقوى بيكي واحس انه معايا سند بيقولي انتي صح وكملي
 واني ولله الحمد بنتي ما تعرف طريق اىمواد الحافظة ولا الحلويات والشيبسي ومتبعة تعليماتك بالاكل والشرب
بحس وسط الامهات اني ام فريدة من نوعها ومختلفة لاني بعامل بنتي على انها امانة من ربي في كل شي اكل وشرب ورعاية وحب و
وده اتعلمته من مقالات الجروب و البوستات الصحية و التربوية
وتشجيعك ودعمك لينا
 واخر شي وانا بفطم بنتي اتبعت اسلوب اني انا مصابة و متألمة و لا اقدر ارضعها كما في مكقال الفطام لحضرتك
فبنتي رفضت ترضع لانها خايفة عليها وبتعبر عن حنيتها ليا واحتوائها لاني احتويت وربيت بطريقة مختلفة عن امي واختي وخالاتي

بحصد بعد سنتين حنية وحب اتمنيتهم من ربي بقالي زمن و الجروب سبب فيهم
بجد ربنا جعلكم ليا ولبنتي سبب ان حياتي تكون كدة واكون راضية عنها وحاسة بالفخر وانا اربى بنتي

*******************************************
و هذه مقالة للاستاذة منة صلاح رأيت انها مكملة لغرض مقالتى
محتاجه أحكي معاكوا شوية عن "الأمان" الطفل لما بيتولد حاجات كتير بيكون لسه مش مدركها مش بيشوف الدنيا زي ما بنشوفها ولا حتي لسه فاهم إنكوا بقيتوا إتنين مش في جسم واحد أكبر حقيقة في حياته هي ماما و قربه من نفسك و دقات قلبك ,كلبشته فيكي لما بيكون قلقان و حضنك ,قربه منك لما بيجي يرضع و الوضع ده بيبقي فيه حالة حب شبه المعجزات هو بالنسباله من أكتر معاني الأمان = 1- وجودك و حضنك +2- ثقته فيكي إنك مش هتأذيه +الرضاعة
مش عارف إن في أي حاجة منهم هتتغير هم عنده زي الثوابت ميعرفش إن في فطام هيحصله ولا دي حاجة محتملة بالنسبة ليه الرضاعة هي الأمااااان فاهمين يعني إيه أمان ؟
هديكي مثال بعيد شوية بس في الحقيقة هو شبه إحساس الطفل بالظبط ,تخيلي إنك متعودة من يوم ما جيتي في الحياة تنزلي الشارع بحذاء هو ده معني "الأمان" لرجلك في الشارع ,فوجئتي في يوم إن كل أحذيتك محطوط فيها زلط و حاجات بتشك و كل ما تحاولي تلبسيه حد يشده منك و يقولك لأ هتنزلي الشارع كده !!! متخيله هتحسي بإيه ؟
سريرك مصدر أمانك اللي بتترمي عليه أخر يومك بعد التعب لقيتي عليه حاجات شكلها مخيف و إنت مش فاهمة دي إيه ؟
باب شقتك اللي بتقفليه كل يوم فجأة إتشال تماما إختفي و إنت لازم هتباتي في الشقة و تكملي حياتك كده !
شايفه الأفكار دي مش منطقية إزاي ؟
متخيله لو دي حقيقة و كل الناس حواليكي بيتعاملوا إن ده عادي هتحسي بإيه ؟
------------------------------------------------------------------------------------
طب تفتكروا لما يبقي طفل لسه مكملش سنتين من الثوابت في حياته إن رضاعته منك هي الأمان اللي هيلاقيه أي وقت و في يوم رايح عليكي زي ما متأكد و بيحتاج و بيلاقي كل يوم يلاقي ثدييك عليه مكركروم كأنه دم ,طعم مفزع و مر مش فاهم ده إيه , لون بني... مدركين ده عواقبه إيه ؟
الفطام مش بالدراع الطفل علشان يتفطم لاااااازم الموضوع يتسحب بالتدريج و علي أكتر من جانب :
1- يلاقي معاني تانية للأمان و يفهمها و يتطمن ليها (ثوابت جديدة )علي الأقل جدا تستمر شهر قبل الفطام زي :
*روتين جديد للنوم فيه خطوات بتتكرر كل يوم بنفس الترتيب و الشكل مثلا (دش دافئ -مساج - لعبة - غناء ..)
*أوضاع جديدة فيها تلامس و تقارب جسدي غير الرضاعة (شيله - لعبة ..)
*أحضاااان و تواجد للأم مع الطفل #خصوصا أخر أيام الفطام
2- الرضاعة تقل بالتدريييييييييييج (قد تصل لسنة كاملة اللي هي تاني سنة):
* يعني بدل ما كنت بجري بلهفه أرضعه وقت ما يعوز ,أحاول ألاعبه حتي دقيقتين و بعدين أستجيب ,شوية و يبقوا 5 شوية يبقي 10 ....
* أقسم الوقت رضعة و نخلصها بدري شوية صغيرة أوي و نكمل الوجبة أكل ...
*أقلل عدد الرضعات بالتدريج
**الجزء ده ممكن ألجأ لأخصائي رضاعة فيه هو أدري
3- إنشغال بحاجات جديدة :
*فترة التقليل الأخيرة أبقي عملالها خطة تسلية خروج و فسح و لعب و زيارات حاجات كتير مش معتاد عليها
دي خطوط عريضة بس إبحثوا و إستعدوا كفاية ,نفسية الأطفال الفترة دي و جهازهم العصبي فعليا زي البسكوتة و الرضاعة مش شوية لبن الطفل هيفقدوا دي صدمة بالنسبة ليه مش علي البال ولا في حيز المنطق
************************************************************************
للأسف الشديد أكتر 3 نصايح مدمرين :
1- وديه عند أي حد و إبعدي عنه اليومين دول و متخليهوش يقرب منك
2- أفطميه مره واحدة مش هتيجي غير كده هتتعبي و هاتي من الأخر !
3- حطيله ...... علي صدرك
بصي كده ال 3 مفاهيم للأمان فوق و بصي لدول ؟
فاهمين يعني إيه بدل ما بوجد أمان جديد بشويش و كل ما أتطمن إنه إرتاحله أسحب اللي إتعود عليه من غير ما يحس,بشوهله اللي إتعود عليه بحاجة هو مش فاهمها أصلا علشان يقرف و ميجيش جمبه و ممكن ميلاقينيش أنا شخصيا كمان و كده أنا فطمته !!!
دروب رهيب عامل زي القلم علي وش الطفل
*مش فاهم ليه أصلا مش من حقه يرضع بعد ما كان بيعمل كده كل يوم ؟
*مش فاهم ليه المكان بقي طعمة ولا شكله حاجة تخض فجأة ؟
*مش فاهم ليه كل ما يحاول يقرب ماما تبعده ؟
*مش فاهم ليه ملامحك اللي مليانه حب بقي فيها قلق و بعد كل ما يجي يرضع ؟
*مش فاهم ليه هو مخضوض و كل الناس عماله تلهيه بلعب و بيضحكوله كأن مشاعره مش موجودة ! و هو مش عارف يعبر بس محدش فاهم ولا مقدر 😞
نتيجة ده منتظرين إيه ؟
بيحصلهم أزمة فطام و تاخد صور كتير كلها ليها معني واحد : إنه متوتر و مخضوض و بيتفطم #غلط
1- يحاول يرضع منك رغم كل قلقه علشان يتطمن بيكي و يرضع بالمر و المكركروم و بكل حاجة 😭
2- ينتقم و يضرب و يعض فيكي أو يرفض يجيلك
3- يبدأ يرمي نفسه علي الأرض و نوبات الغضب تزيد
4- يفضل يحاول بإستماته و يعييط علي الرضاعة و الموضوع يزيد ميقلش
و إحنا نقول طبيعي هو أه طبيعي بتبقي فترة صعبة بس لو أنا عملت فيه كل اللي فوق ده فأكيد صعبتها عليه كتيييييييير و أحيانا بعد كل ده أبدأ أشخط و أزعق إنه مقريف علي طول و أجي عليه أكتر
لحد ما تيجي فترة ما يستسلم #ينهك من التعب و تخلص المرحلة
***************************************************************************
أنا الفطام خارج تخصصي لأي حد هيسألني عن السن و عدد الرضعات و الأكل ده لازمله متخصص رضاعة بس حبيت أتكلم من المنظور النفسي الطرق الغلط مش هينه ,من كام يوم لقيت أم بتسأل علي جروب أنا ناوية أفطم النهاردة و معنديش صبار أحط إيه ؟
فوق ال 100 كومنت معظمهم بيتفنن في أكتر حاجة مقرفة تنفر الطفل و نصايح لو إتجمعت هتبقي تحت عنوان "أخطر و أضر طريقة لفطام طفلك "
اللي تقول سيبيه عند مامتك و لازم فطام فجأة و اللي تقول حطي بن ,لون دم , كمون و لمون ,شطة , و واحدة بتقول للأم خدي شوية شعر من فرشتك حطيهم علي صدرك الشعر لما بيجي في بقه بيقرف جدا أنا إبني من يوم مهوبش جمبي تاني 😓😥😥😭
رغم إني متعودة في شغلي علي حاجات كتير بس معرفش ليه لقيت دموعي نازله مجرد ما حطيت نفسي مكان الطفل علي قد عقله و إدراكه الصغير يمكن كمان حزنت علي الأمهات اللي مصره تاخد نصايحها من أمهات زييها لمجرد إنهم أكيد عارفين الصح ! صعب عليا لما فتحت جوجل و اليوتيوب و كمية الدكاترة اللي بيشرحوا الطرق بالتفصيل و بيحذروا بالإجماع من أكترية النصائح اللي شوفتها و مجرد ما فوقت شوية كتبت المقال
و الله في حاجات بقالنا سنين تتوارثها الأجيال غلط حتي لو كل الناس عملوها و لسه عايشين !
و الله ما شطارة ولا مؤشر كويس إن الطفل يحقق الهدف (يسيب الرضاعة) بسرعة
و الله هتلاقي ناس تنصحك بمنتهي الثقة و تتخانق معاكي علشان تقنعك و كلامها يبان منطقي و مليان نجاحات و هو مش صح و مؤذي و هم مش عارفين
الحكاية مش دايما بتحقيق الهدف مش معني إنه إتفطم يبقي الطريقة صح و ناجحة لإن بيبقي ليها عواقب كتير إنت مش رابطاهم ببعض
الموضوع مش صعب كل المطلوب نستغل النعمة اللي إحنا فيها العلم ناقص يمطر علينا و ببلاش و من بيتك إحنا ماسكين في السكة الغلط بإستماته ليه ؟
كتير بيبقي في ظروف خاصة و كتير الرضاعة الطبيعي مش بتكون متاحة لظروف ما ربنا بيرزق أطفال درجة تكييف أعلي من غيرهم و ربنا رحيم بالطفل أكتر من أي حد متتخيليش إنه ناقصه حاجة أو بيتأذي علشان إنت عندك مشكلة صحية 
أنا بتكلم عن أم بترضع طبيعي و هتفطم هنا الوضع بيختلف
اللي فطم فطم مش هدفي نلوم نفسنا ربنا رحيم و بيستر بس متكمليش في السكة دي في كل تحدياتك مع ولادك ,لو الفطام عدي لسه في تحديات كتير لو غيرتي مصادرك و قفلتي تماما مبدأ أسأل أي حد خلف ده , ممكن الحياة تبقي أحلي كتير مع ولادك صدقيني 
هونوها عليكوا و علي ولادكوا و كفاية تجارب 
#منة_صلاح متخصصة تعديل سلوك أطفال و مراهقين

تجربة ناجحة فى الفطام

حبيت اشاركم تجربتى فى فطام ابنى  
مبدأيا انا قررت افطم ابنى على تمام العامين وبدأت فطام تدريجى من قبل مايتم العامين بشهرين ازااى؟
اول حاجه نويت انى افطم ابنى واستعنت بالله واذكركم بقول سيدنا النبى محمد واستعينوا على قضاء حوائجكم بالكتمان وتصدقت بنية ان ربنا يسهل عليا فطامه 
تانى حاجه عملتها انى قرات عن اصح فطام للطفل وافضل وقت للفطام ولاقيت ان افضل فطام هو فطام تدريجى عامين 
فادنى جدااا فيديو جميل لدكتورة Marwa tamer -اسألكم جميعا الدعاء لها بالشفاء العاجل - اتكلمت فيه عن الفطام وتجربتها بإذن الله هرفق الفيديو فى التعليقات 
بس اكيد كل تجربه بتختلف من حد للتانى تبعا لظروفه
فى الاول بدأت اسجل عدد الرضعات على مدار اليوم عشان بشكل تدريجى كل اسبوع انقص رضعه ولكن الطريقه دى مانجحتش معايا لان في ايام كانت عدد الرضاعه بيقلل وايام تانيه يزيد تبعا لظروف اليوم
فاعتمدت طريقه سميتها الصياام وهى انى ابدا مع ابنى وكأنى بعلمه الصيام عن -الرضاعه الطبيعيه- بس صيام من نوع خاص صيام عن الرضاعه فقط 
بدأت معاه اول مرحله من الساعه 8او9على حسب وقت الصحيان صيااام عن الرضاعه لحد الساعه 11 واعوض فى الوقت ده فطار مغذى ولما تيجى الساعه 11ارضعه عادى وكل مايطلب صدرى ارضعه ولكن ما اعرضش عليه الرضاعه 
واستمريت اسبوع لحد ماثبت اول مرحله وهى الصيام لمده ساعتين لحد ماهو اتعود على ان الوقت ده مش وقت رضاعه 
وتانى مرحله بدات امد وقت الفطام لغايه الساعه 2 وفى الوقت ده كنت بلزم نفسى انى ما اقعدش قدامه او يلاقينى فى وضع الجلوس وبحاول ألهيه عنى باللعب شويه وبتجهيز الفطار او اشاركه فى اللعب او نخرج سوا اجيب طلبات المهم انى امنع تماما الرضاعه لحد الساعه 2 وبعد الساعه 2لما يطلب ما ارضعه برضعه ويستمر اليوم عااادى جدا وارضعه كلمايطلب واستمر اسبوع لحد ماثبت الفترة التانيه للفطام
بعدهابدات المرحله الاهم التالته تابته هههه بدات امد فترة صيامه عن الرضاعه الى الساعه 6وفى الاسبوع كان لازم املى الوقت ده بشىء مسلى له فاستضفت في الاسبوع- ده طفلين بعمر 6و5 ولاد عمته -و كان بيتلهى جدا فى اللعب معاهم 
طبعا ممكن لو مافيش اطفال تقدرى تستضفيهم او هيبقى الموضوع مرهق بالنسبه لك ممكن فى الوقت ده تنزلي معاها وتقضيه زيارات واهى -فرصه لتقويه صله الرحم- او تتزليه فى نادى وتبقى معاه كللل واحد على حسب ظروفه ونمط حياته 
المهم ان الفترة دى اتلهى فيها ونسى الرضاعه باللعب معاهم ولما كان فى فترة القيلوله اللى بينام فيها ومتعود على انه ينام على صدرى كنت بنيمه على كتفى واطبطب عليه بشويش وادندن له باغانى الاطفال
بعد ماثبت مرحله الصيام عن الرضاعه لغايه الساعه 6 وكل ده وانا بعوض بوجبات فطار وغداء وعشاء ويتخللهم وجبات خفيفه وحلوة 
بعدالاسبوع التالت بدات ازود الفترة لغااايه وقت نومه الساعه 9 فى الوقت ده كنت بنيمه بس على صدرى وبعد كده بالليل لو صحى يرضع بعرض عليه فى الاول مياه بحط الكوبايه جنبى عشان لما يصحى ما اضطرش اقوم وبالتالى يصحى اوقات كان يشرب المياه وينام فكنت بسيبه من غير ما اعرض عليه يرضع واوقات تانيه كان بس بيطلب يرضع وكنت برضعه عادى الاهم انى بدات اقلل عدد الرضعات لرضعه قبل النوم
االاسبوع الرابع كان قبل نومه بساعة كنت بأكله كويس جداا عشان اعوض منع الرضاعه وفى نفس الوقت اضمن ان طلبه الرضاعه بسبب التعلق لاغير مش جوع او ملل وكنت بنيمه على كتفى واطبطب عليه واغنيله اغانى حلوة بتاعتالاطفال
جينا للااااخر اسبوع- واسفه انى طولت عليكم بس انا حبيت اسرد كل شىء بالتفصيل الممل للافاده -
الاسبوع ده يفضل ينام جنب الطفل اكتر حد متعلق بيه الطفل ومصدر امان بالنسبه له بعد امه 
وطبعا الشخص ده بالنسبه لى كان ابو ابنى - ربنا يحفظه -كان بينام مع ابنى فلما يصحى بليل يقلق من نومه يلاقيه جنبه كان يهديه ويعرض عليه المياه وينام تانى من غير مايطلب يرضع واناكنت بنام بعيد عن ابنى فى قوضه تانيه فى سريرتانى المهممم انى مابقاش جنبه لانه فى صحيانه بليل هيطلب الرضاعه طول ماانتى جنبه انما لو بعدتى شويه مش هيركز هيصحى وشويه طبطبه من والده او اى حد متعلق بيه غيرك هينام تانى ومش كل صحيان منه بليل يبقى معناه انه عاوز يرضع وبعد اسبوووع من نومه المنفصل فى سرير لوحده مع والده اتفطم ابنى من غير ااااى الم فى صدرى او اى مسكن او برشاام ومن غير ما ابعده عنى عند جدته ومن غير ما اثر على نفسيته واخر حاجه مهمه ان فترة فطامه تبعدى تماما عناى ملابس مفتوحه الصدر وملحوووظه صغننه ممنوووع تمام لما الطفل يصحى بليل فى فترة فطامه تعرضى عليه عصائرر غلطططط لانها هتسبب له غير تسوس الاسنان كمان مش هتبقى مفيدة بالنسبه له كوب لبن كويس جداا وقبل ماينام
اسفه انى طولت عليكم




اذا لم تستطيعى التطبيق ,زورى استشارية الرضاعة الطبيعية

المقال من باب المعلومات العامة و لا يغنى عن زيارة الطبيب.فاستشيرى طبيبك و طبيب طفلك فى كل ما يخصكما

No comments:

Post a Comment