تجربة ام غيرت طريقتها فى اطعام بنتها

انا ام لطفلها عمرها سنة لما بدأ  الحجر و قعدنا فالبيت بنتي اكلتها بدأت تقل شويه بشويه
و بدأت اتوتر و كان كل تركيزها انها تمسك المعلقه و تأكل نفسها فكانت لا بتعرف تآكل ولا بتسيبني ءأكلها والنتيجه انها مبتاكلش و كل مادا التوتر بيزيد
وبعدين قولت خلاص هسيبها وتقبلت الكميه اللي بتاكلها علي امل ان الحجر مؤقت ونخرج وترجع الحضانه وتأكل تاني بس الموضوع زاد جدا و عدا عليا يوم مكلتش فيه غير علبه ذبادي
بعدها شوفت فيديوهات كتير عن ازاي افتح شهيه الطفل بدأت ادخلها معايا المطبخ ونحضر الاكل واقولها اسماء الخضراوات والفاكهة ولما نخرج ناكل اقولها يلا عشان ناكل الموزه اللي قطعناها مثلا
 والحمد لله رجعت تآكل وبقيت اوقفها جنبي نغسل المواعين اي نعم بتاكل الصابون بس اهو كنت بعرفها علي الصابون 😂
ونيجي بالليل اخدها فعربيتها ننزل نتمشي جانب البيت وساعات تنزل من العربية تتمشي ونرجع ناكل في مدخل العماره والحمد لله بتاكل.
بالنسبه بقي لانها تمسك المعلقه بقيت اعملها نشاط بعيد عن وقت الاكل انها تنقل اي اكل من علبه لعبه بالمعلقه بس لسه بنحاول فيه
اهم حاجه وقت الاكل اكون هاديه و بضحك و ممكن نشوف اشكال الحيوانات اللي بتحبها او نتكلم في اي موضوع
 حتي لو مش بتتكلم انا برضه بكلمها و اكتشفت ان ده بينمى ذكائها و مع الوقت بقت بتفهمنى . الأطفال بتفهم والله بس نعاملهم على انهم بيفهموا.
التوتر كان سبب مشكلتى و الحمد لله سعيدة ان المشكلة خلصت