السلام عليكم ورحمة الله وبركاته
حبيت أشاركم تجربتي مع د شروق عن إعادة الإرضاع
الحكاية بتبتدي إن ربنا رزقني بطفلي الأول الحمدلله على رزقه، لكن للاسف الحلمات كانت مسطحة
و مكنتش قريت فى الحمل ازاى اتعامل مع الموضوع دهوالمعاناة بدأت من هنا، بس الصراحة لقيت مساندة من أهلي إن استخدم السرنجة لإظهارها وطبعا عملت كده كتييير والحمدلله بدأ ابني يرضع والأمور ماشية زي الفل
لحد ما عدى 10 أيام على الولادة بس حساه مش بيشبع، إحساسي إن فيه حاجة غلط حتى في عياطه، يشاء ربنا بالصدفة أعرف إن لسانه معلق أو مربوط طبعا انهياااار
عملت اللسان بس لونه أزرق وهو بيعملها الدكتور شك
بصي أنت تروحي تعملي إيكو وماله، روحت والمعاناة التانية بدأت عياط وزن من لسانه يا قلبي ورافض الرضاعة وأنا كالعادة انهيار، الأهل مينفعش كده، قلبه هيقف من قلة الأكل، طب عصري صدرك في الببرونة، حاااااضر المهم يرضع وبالفعل بعد مرور 24 ساعة من غير رضاعة ورفضها، رضى بالببرونة وكان يوم ونص بس (الحمد لله إنه رضع لولووووولي يا ألف بركة) لكن مكنتش عارفة إن في مأساة تانية في انتظاري وهى رفضه صدري إطلاقا
طيب عملت الإيكو عرفت إن عنده ثقب في الأذوين وارتفاع ضغط الشريان الرئوى.
وطبعا الرضاعة بقيت بالببرونة تعصير من صدري وصناعي، والحقيقة أهلي ساندوني في حته التعصير علشان اللبن مينشفش لكن مقدروش يساعدوني أقنع ابني ازاي يرضع، أهلي ارضي بنصيبك ومفيش فايدة هيرضع صناعي واللبن عاجلا أم آجلا هينشف
كعادتي انهيار نفسي يرضع علشان مناعته وعلشان الرضاعة الطبيعية هتحل مشكلته الصحية بس ما باليد حيلة
يشاء ربنا وبالصدفة أشوف بوست لدكتوره شروق عن إعادة الإرضاع، طبعا ولا فاهمة أيتها حاجة، يعني ممكن طفل يقعد بالشهور رافض رضاعة طبيعية ويرجع يرضع تاني
بحثت ولقيت فيه استشاريين رضاعة وطبعا أول مرة أسمع عنهم
شفت فيديوهات ومنها لدكتورة شروق، طب الحمدلله فيه أمل
جيت أحجز عندها عرفت إمكانية حل مشكلتي بالتليفون و مقتنعتش
طب فيه صفحات لاستشارييين بترد أون لاين، فتواصلت مع دكتور عرفت إنه في كفر الشيخ، حكيت له حكايتي وعرف إنى في إسكندرية اقترح اروح ل د شروق ،و انها دكتورة شاطرة.
اقتنعت بالدكتورة أكتر، بس مقتنعتش بفكرة التليفون وده سوء اعتقاد هكتشفه بعدين.
حجزت ورحت لها
رحبت بيا و حكيت الحكاية من الأول وكده ابني مانع الرضاعة أسبوع،
د : طب الحمدلله مش كتييير، تعالي أعلمك الرضاعة بالإصبع وفيه الجلد للجلد يوميا
أنا : زي الفل واستجاب لها الحمدلله
د: وبالقطارة وشرحت هنعمل إيه ونوقف الببرونة
روحت وجيت أطبق بحماس مع ابني، أول يوم عدى والتاني الحمدلله والتالت في آخره والعند اشتغل وصرااااااخ ضعفت علشان قلبه ميتعبهوش
وكنت طبعا رافضه وضع الجلد للجلد
يا دكتور هيبرد مني ونزلات البرد غلط علشان قلبه
د: متقلقيش وحكتلى قصة جميلة
قصة الممرضة كانت بتتدرب على وضع الجلد للجلد بعد الولادة
و ده كان فى شهر يناير
بعد 3 دقايق جريت علشان تشيل الولد و بتقول بسرعة يا جماعة هيبرد
و اول ما لمسته اتنفضت و هيا مذهولة!!
ده جسمه سخن!!!!
و ده بسبب افراز هرمونات فى جسم الام و الطفل
رجعت طبعا للببرونة بسبب خوفى من عياطه علشان قلبه
وعملت الجلد للجلد بدأت بنص ساعة وكان بجد أجمل إحساس
ولقيته بيبقى دافي وحرارته واخدها من جسمي رغم كونه بالبامبرز بس وطبعا بعرض صدري كل شوية وهو شبعان ومفيش جديد وانهيار ومحطمة، فقريت قصص كتييير في الصفحة هنا وإن الجلد للجلد سحرطب أزود بقيت أعمله ساعة يوميا وأعرض صدري عليه ويشاء ربنا رضع مره في يوم وكانت الفرحة مش سيعاني، بس طبعا يقوم جعان مفيش صبر وعياط ومش عايز.
كل ده بدعم من دكتورة شروق والتواصل معها بالتليفون
اللي كنت رفضاه، د:اتمسكي بالأمل ده واستمري وأنت شطورة علشان كنت ديما أكلمها بانهيار أنا أم فاشلةوالحمد لله رب العالمين بالاستمرار على الجلد للجلد واعرضي صدرك كل شوية حتى لو مش هيرضع،
و الحمد لله قبل الرضاعة من ناحية واحدة،
جري على د شروق بعتلها واتس
د: ما شاء الله برافو تعالي لي
رحت العيادة شرحت الأوضاع الصحيحة للرضاعة،
أنا : بس ده مش عايزني من الجنب اليمين
د: مفيش حاجة اسمها كده صححي الجملة، محتاجين نظبط وضع الرضاعة
، علشان قدامها بمساعدتها رضع منه
وفعلا العيب كان فيا أنا مش عارفه أمسكه كويس من الناحية ديواتبعت طريقة الرضاعة زي ماقالت لي وبالفعل رضع منه
تقريبا كنت معذباه وقفنا الببرونة الحمدلله خالص وبيرضع بس مني مع طبعا شرب الحاجة اللي بدر اللبن، بقى يكفيه.
فالفضل لربنا الحمدلله اللي خلاني أشوف بوست د شروق.
والفضل ثانيا لها دعمتني كتيييييير
أشكرك، وأكتر الدعم بالواتس اللي كنت رفضاه أنا مزرتش العيادة غير مرتين
تعليقات
إرسال تعليق