ممنوعات حساسية الألبان لا د جيهان فؤاد

                     ممنوعات حساسية اللبن

1. اللبن بكل أنواعه والزبادى والجبن كلها .
2. الكريمه والكريمر بتاع النسكافيه والكريم شانتيه والكريم كراميل وأي حاجه فيها لبن زى الرز المعمر والباشاميل .
3.  الزبدة والسمنة والقشدة ممنوعين أكلك هيبقا بزيت، ده حتى بسكوت الشاى هتلاقي فيه لبن او زبده -الا انواع قليلة -  مسموح .
4. جميع مخبوزات الفرن الإفرنجي ما عدا العيش البلدي لإن العيش -الفينو والابيض-معظمه بيتعمل بلبن او بيلقط لبن فالمسموح البلدى بس .
5. البسكوتات و الحلويات ممنوعة  معظمها داخل فيها لبن فممنوعة ،، ماعدا المشبك ولقمة القاضي البيتي انما بره ممنوعة  ،، طبعاً الشوكولاتات ممنوعة فيها لبن  - ماعدا انواع نادرة من الدارك شوكولات او الخام.
6. الهوت دوج والسوسيس واللانشون مع انها لحمة ،، بس بتتعمل بلبن !!
7.  السيريلاك والهيروبيبي وريري دول أصلاً منتجات أكبر شركات ألبان ف العالم يعنى وارد جداً ان اي منتج حتى لو مش مكتوب عليه لبن يبقى "لاقط" لبن لان خط الانتاج واحد فممنوعين تماماً والمسموح فقط البديل المصري ريري فليكس والمستورد هيومانا.
8.  قراءة "محتويات" أى أكل خارجى مهم جداً لاحتوائه على اللبن بصورة مخفية ، اي حاجة مكتوب عليها "قد يحتوى على آثار من اللبن " ممنوعة ، كازين وكازينات ولاكتوز ولاكتوجلوبين وقشطة، واى بروتين ، مكسبات او نكهات تحتوى على الزبدة ، كسترد ، دانيت ، كريمة ، حلوى الكراميل ، كل ده ممنوع.
9.  معظم الأكلات في المطاعم الخارجية يتم دخول ممنوعات فيها .. الفول والطعمية بعضهم بيستخدموا السمنة مع الزيت لرخص الثمن أو يحطوا الفينو في الطعمية  ،،  استيك الفراخ او اللحمة بيدهنوها زبده قبل الشوى عشان تدى طعم ومبيقولوش ،،الفراخ "البروستد" بتتحمر في بيض وبقسماط، بعض المحلات بتستخدم خلطات تحمير أو شوى فيها زبادى ، معظم"صاجات" الفرن الأفرنجى بيتعمل فيها المنين والبسكوت والنواشف بزبدة وسمنة ونفس الصاج بيتعمل فيه العيش الابيض او الفينو ،، فناخد بالنا كل ده ممنوع والفيصل التجربة بعد سماح الطبيب..!
10.  التونة : ممنوعة عشان بتتحفظ بال"كازين(بروتين اللبن)" من غير ما يكتبوا ،، عشان كده ممكن يحصل منها تحسس.
11. الحلاوة الطحينية : بيحطوا علي القوالب كمية سمنة عشان تتقلها وكمان مبيكتبوش ، ف"ممنوعة" .
12. الطحينة : مش ممنوعه بس سلطة الطحينة معظم المطاعم بتخلطها زبادى فممنوعة .
13. چونسون و وسانوسان العادى داخل في مكوناتهم اللبن وفي أطفال بيتحسسوا منهم ،، البديل زنك أوليڤ أو سانوسان الأخضر(بانثينول)أو سيباميد.
14. اللحمة الحمرا عموما .. بنمنعها ابتداءاً اعتماداً علي دراسة مصرية بتقول ان ٢٣٪‏ من الاطفال اللي متحسسين من اللبن متحسسين كمان من اللحمة وطبعا هندخلها بعد التحسن تحت إشراف طبيب وطالما منعنا اللحمة  فكل الكبسولات فيها چيلاتين فممنوعة للي ممنوعين من اللحمة للشك في حساسية لحمة مع اللبن كذلك الچيلي والمربى والعصاير المعلبة .

هذا المقال للمعلومات العامة و لا يغنى عن زيارة الطبيب فاستشيرى طبيبك و طبيب طفلك فى كل ما يخصكما

نقلا عن اد جيهان فؤاد