أنا أم أعيش فى دولة أوروبية
عايزة اشارك معاكم قصتى في اعادة الارضاع
انا اول ما ولدت كانت الامور تمام و كنت برضع طبيعي ولكن بعد يومين بعد الولادة اضطريت اعمل عملية في بطني قدر الله و ما شاء فعل و ساعتها كنت مش عارفة اشيل ابنى و ارضعه و اديتله صناعى بالببرونة غصب عنى
بعد ما خفيت شوية بدأت ارضعه لكن علشان اللبن مكنش كتير كنت برده بديله الصناعى بالببرونة
بدأ ابنى بالتدريج يقلل مدة رضعته الطبيعي و يعيط جامد لان مفيش لبن و عايز ببرونة لحد عند سن شهرين رفض صدرى تماما
طبعا كانت حالتى النفسية سيئة جدا لانى نفسي ارضع طبيعي
المهم قريت مقالات دكتورة شروق و وقفت الببرونة و بقيت اديله بالسرنجة و اشفط صدرى بالشفاط و بعد مرحلة السرنجة بدأت الارضاع بالاصبع مع الرايل و اعمل الجلد للجلد.
طبعا عملية مرهقة جدا و هو بيعيط على طول لانه عايز الببرونة و انا كنت تعبانة و مرهقة خصوصا انى لوحدى في الغربة و طبعا البيت مكركب على طول و مكتئبة على طول.
جوزى و مامتى يقولولي الصناعى حلو برده و مش وحش و مش لازم ترهقي نفسك.. كل ده كان ضغط نفسي عليا و مكنش فيه استشارية رضاعة قريبة منى.
قررت اكلم دكتورة شروق شخصيا و اتابع معاها عن طريق النت
و الحقيقة انها قدمتلى الدعم الكبيرررر النفسي و المعنوى الى كنت محتاجاه شجعتنى استمر و كنت كل ما ايأس و اقول مفيش فايدة هى تشجعنى و تقولى ثقي بالله انك تقدرى و ادتنى نظام اكل ليا و اعشاب تساعد على زيادة كمية اللبن لحد ما ابنى الحمدلله بدأ يرضع منى
لحظة من اجمل لحظات عمرى لما رجع لحضنى و بدأ يرضع من صدرى مع الصناعى باستخدام الرايل
بالتدريج قللت كمية الصناعى و بدأ ياكل من سن اربع شهور ده ساعد اكتر انى اقلل الصناعى
حاليا هو عنده ست شهور و تقريبا مفيش صناعى والا قليل جدا و باذن الله مستمرة لما يقف خالص
الموضوع متعب لكن مش مستحيل
و الصبر و الدعاء و الثقة بالله ثم الثقة بالنفس سحر والله
الموضوع فعلا يستحق التعب علشان صحة اولادنا
واحب اشكر دكتورة شروق على نصايحها و على دعمها الكبير ليا و اخلاصها و حبها لشغلها
ربنا يجازيها خير يا رب و يباركلها
هذا المقال للمعلومات العامة و لا يغنى عن زيارة الطبيب فاستشيرى طبيبك و طبيب طفلك فى كل ما يخصكما
No comments:
Post a Comment