انا بدأت غلط مع بنتي من تاني يوم ولادة جبتلها لبن صناعي وكنت مقررة اني اعودها عليه وع السكاته عشان أنا تعبت جدا مع اخوها مأخدش الببرونه ولا السكاته .
فكان بالنسبه ليا المرة ده كان لازم استخدم الببرونة والسكاتة أساسي معايا وفعلا جبتهم من تاني يوم الولادة وكنت بديها كتير من الببرونة عشان أعودها على الببرونة وده كان سبب أن بنتي فضلت مش عارفه تمسك الحلمة لمدة شهرين.
وبعد تطعيم الشهرين بنتي رفضت الرضاعة تماما والغريبة أنها رفضت الببرونة كمان.
ومكانتش ترضع غير وهي نايمة بس ومع الوقت برضو مابقتش ترضع مني وهي نايمة رفضته تماما وبقيت وزنها يقل وصعبانه عليا جدا مش عارفه اعمل ايه .
كنت كل لما احاول ارضعها تفضل تبعد وتعيط جدا وتبقي نايمة ومغمضة عينيها ومجرد ما احاول ارضعها تعيط وتبعد.
فضلت ع الوضع ده اربع شهور . وقت كبييييير جدا مش قليل عليا وعانيت فيه وانا شايفاها جعانة ومش عارفه اتصرف. طبعا حاولت اكلها ما هي جعانة ومش بتنام .
وبرضو كنت بحاول ارضعها وهي ترفض بعياط.
كل ده عرفتي قيمة الرضاعة الطبيعية وأنها نعمة كبيرة من ربنا وبقيت ادعي ربنا كتير واصلي صلاة حاجة ان ربنا يهديها
لحد لما قريت ع الفيس عن موضوع الرضاعة الطبيعية وإعادة ارضاع شوفت أن كل ما يكون الطفل كبير بيكون صعب جدا وانا قولت هي كدا خلاص نسيته ولبني قل جدااااا
فعلا بقيت زعلانة وكان نفسي اخدها ع صدري وتنام زي اي ام بترضع طفلها وينام على صدرها اربع شهور رافضه الرضاعه ومهما أأكلها ماكنتش مكفياها وبرضو جعانه.
كل ساعه اقوم أحضرلها وجبه مختلفة عشان هي متزهقش
غير انها كانت بترجع كتير
قررت التوكل ع الله واشوف موضوع إعادة الرضاعة.
شوفت صفحه الدكتور شروق وتواصلت معاها ولها جزيل الشكر . وبصراحه افادتي جدا
قالتلي ع موضوع الجلد للجلد وعملت زي ما قالتلي و بنتي كانت بترفض أنها تقرب
لكن واحدة واحدة بقيت تنام عليا وطبعا شيلت السكاته تماما زي ما دكتور شروق قالتلي
وفعلا الموضوع ما خدش معايا غير يوم واحد بس.
مش كتير زي ما سمعت هتفضل ع كدا اسبوع او اكتر
بالعكس أنا نويت واتوكلت ع الله ومسمعتش كلام اللي قالولي خلاص هي نسيته وهتكبر على كدا وكان عندي ايمان بالله انها هترجع تاني وفعلا الموضوع ما خدش غير يوم وده والحمد لله كان تيسير ربنا
وفعلا اتاكدت أن مافيش حاجه مستحيله حتي لو صعب فهو مش مستحيل
انا بالنسبه ليا اني أشيل السكاتة فدي خطوة صعبه اوي عليا أنا كنت بيديهلها عشان أنا اللي ارتاح بس مع الاسف اتعذبت معايا وانا اتعذبت كمان.
وعرفت قيمه اللبن رغم أن ديه المرة التالته ليا أرضع.
أنا قولت هتاخد لبن صناعي وبعد كدا هتاكل يعني هتبقي جسمها تخيين وده اللي أنا عيزاه.
ماكنتش عارفه ايه اللي هشوفه ولما قررت اعمل محاوله اعادة ارضاع ماكنتش متأكدة أنها هترضع لكن توكلت على الله وربنا كرمني وبنصح اي ام بلاش ندخل اي حاجه للطفل غير الفطرة اللي ربنا نزله بيها أن يرضع من مامته بس وبلاش سكاته وببرونه وأن لبن الأم في كل حاجه مفيدة ويقوي الطفل وصحته تبقي كويسة وكفايه أن بنتي بتنام ع صدري كفايه اني اشبعها حنان مني وان شاء الله هفطمها ع السنتين.
واوقات كمان تفضل طول الليل تمص في السكاته ومتاخدش الببرونة وعياط من الجوع
بس اللهم بارك ربنا ساعدني كتير وشكرا للدكتور شروق اللي متاخرتش عني . شجعتني و ادتني امل ان لبني هيزيد وان وزنها هيزيد وربنا جعلها سبب
No comments:
Post a Comment